Prezıdent: «Samuryq-Qazynany» reformalaý esh múmkin bolmasa, ondaı qurylymnyń ekonomıkada qajeti joq
«Samuryq-Qazyna» qorynda reformalaý múldem múmkin bolmasa, ondaı qurylymnyń ekonomıkamyzda bolmaǵany jón. Búgin Parlament Májilisiniń jalpy otyrysynda Memleket basshysy Qasym-Jomart Toqaev osylaı málim etti, dep habarlaıdy Almaty-akshamy.kz QazAqparatqa silteme jasap.
«Samuryq-Qazyna» qory qyzmetiniń tıimdiligi máselesine toqtalǵan Prezıdent búginde bul qordyń aktıvi elimizdiń ishki jalpy óniminiń 60 paıyzyna jýyqtaıtynyn aıtty.
«Iaǵnı osy uıymnyń tıimdi qyzmeti búkil ekonomıkamyzdy órkendetýge tikeleı áser etedi. Qordyń KEGOC, QTJ sıaqty ınfraqurylymdyq kompanıalary ekonomıkamyzdyń barlyq derlik sektorynyń tıimdiligin aıqyndaıdy. Osy tusta qor óziniń negizgi mindetin oryndap otyr ma?! Iaǵnı «Ulttyq baılyqty eseleı aldy ma?» degen oryndy suraq týyndaıdy. Qomaqty jalaqy alatyn qyzmetkerleri, dırektorlar keńesi nemen aınalysady?! Qyzmeti óte qymbat konsaltıń kompanıalaryn jáne sheteldik mamandardy jumysqa tartqannan paıda bar ma?» - dedi Memleket basshysy.
Osy oraıda Qasym-Jomart Toqaev atalǵan qorǵa qatysty Úkimetke tıisti tapsyrma berdi.
«Samuryq-Qazyna» qory elimizdiń strategıalyq aktıvterin basqarý isinde basty ról atqarady. Sondyqtan Úkimetke Strategıalyq josparlaý jáne reformalar agenttigimen birlesip, kvazımemlekettik sektordy túbegeıli reformalaý úshin usynystar ázirleýdi tapsyramyn. Eger qordy reformalaý múldem múmkin bolmasa, ondaı qurylymnyń ekonomıkamyzda bolmaǵany jón», - dedi Prezıdent.