Elimizde elektr samokattarǵa baılanysty birqatar zań qabyldandy. Atalǵan zań jobasyna qala turǵyndary men samokatty jalǵa beretin kásiporyndarynyń basshylyǵy ekiushty pikirde, dep habarlaıdy Almaty-akshamy.kz.
Turǵyndar samokat júrgizýshileriniń jıi jol kólik apatyna ushyrap, zań buzýshylyq áreketterge baratynyn atap ótti.
«Kóshede artymyzǵa jaltaqtap, qorqyp júremiz. Samokat pen mopedke mingender aıaq astynan, joǵarǵy jyldamdyqpen kele jatady. Menińshe, atalǵan zań jobasy tezirek qabyldanyp, samokatshylardy bir izdilikke túsirse. Sebebi, jolda kishkentaı balalar da júredi, olardyń qaýipsizdigine alańdaımyz. Arnaıy shlemmen, arnaıy jolaqtarmen júrgenin qalaımyz», – deıdi Nazgúl Erjan esimdi qala turǵyny.
Kúni keshe, Almatyda samokat júrgizýshisi motosıklmen soǵysyp mert boldy. Qaıǵyly oqıǵa túnde Tımırázev pen Sátbaev kósheleriniń arasynda Seıfýllın dańǵylynyń boıynda bolǵan.
Yamaha motosıklin tizgindegen júrgizýshi Seıfýlın dańǵylynyń boıymen ońtústik baǵytta, al samokatty jalǵa alǵan turǵyn soltústikke qaraı ketip bara jatqan. Samokatshy Polıtehnıcheskaıa kóshesine qaraı solǵa burylmaq bolǵan. Biraq araqashyqtyqty durys eseptemeı, motosıkldiń aldynda burylǵan. Qarsy betten kelgen motosıkl júrgizýshisi joǵary jyldamdyqpen ony qaǵyp ketken.
«Qazaqstannyń ınfraqurylymy velosıped jolaǵyna 500 shaqyrym ǵana beredi. Sondyqtan da samokattardy joldyń oń jolaǵymen 18-ge tolǵan, júrgizýshi kýáligi bar, qorǵaý shlemi bar júrgizýshiler aıdaı alady. Qalǵan jerlerde, mysaly, trotýarda júretin bolsa, basymdyq jaıaý jolaýshylarǵa beriledi. Bıyl 1 qańtardan bastap samokat júrgizýshileriniń qatysýymen 44 oqıǵa tirkeldi. Byltyr 1 adam qaıtys boldy. Osyndaı statısıka bar», – dep baıandaǵan İshki ister mınıstri Marat Ahmetjanov.
Degenmen, atalǵan zań jobasy samokatty jalǵa beretin kompanıalardyń tabysyna zıan keltirmek. Bıznesi endi ǵana qarqyn alyp, tabys kózine kenele bastaǵan bul zań aıaqqa tusaý keltiretinin atap ótti.
«Máselen, bir ǵana «Jet Sharing» kompanıasynyń jalpy satý kólemi 2 jylda eki esege ósken. Kásiporyn 1200-den astam adamdy jumyspen qamtamasyz etip, ótken jyldyń ózinde ishki qazynaǵa 458 mıllıon teńgeden astam qarajat aýdardy. Depýtattardyń júrgiziýshi kýáligi bolý kerek degen zańy bizdi tań qaldyrdy. Meniń oıymsha, samokatty aıdaý úshin 3-4 kún ýaqyt ketedi. Ol úshin arnaıy bir belgilerdi jattap alý qajet emes. Al bas kıimniń dýylǵasy apat bolǵan kezderde kómetespeıdi. Meni taǵy bir tań qaldyrǵandary mopedshilerge nege zań áli qarastyrylmaǵan? Jol apatyn jıi ushyratatyn solar ǵoı», – deıdi «Jet Sharing» kompanıasynyń basshysy Mýsalava Alıbekov.
Qala jastarynyń pikirinshe, bul zań óte qatań. Olar samokatty kóbine qyzyq úshin 1 saǵatqa jetpeıtin ýaqyt aıdaıtyndaryn aıtady. Al júrgizýshi kýáligin alyp júrýge kóbisiniń jaǵdaıy, ýaqyty jetpeıdi.
- Jaıaý júrginshiler jolaǵynda mopedpen júrgenderdi de kózimiz shalady. Olar jyldamdyqty asyryp júredi. Nege olarǵa zań qabyldamasqa?!. Meniń oıymsha, samokatty kúndelikti qoldanatyndar júrgizýshi kýáligin almasa, jastardyń shamasy kelmeıdi. Onsyz da samokatqa otyrǵanǵa 1 saǵatqa 4000 tg ketedi. Bul kimniń bolmasyn qaltasyna aýyr. Stýdentter, oqýshylar samokatty tek qyzyq úshin aıdaıdy. Sol sebepten bul zań tym qatal dep oılaımyn, – deıdi Aqbota Nurmolda esimdi stýdent.