Ár sáttiń ádemi kórinisin qalt jibermeı, máńgilik tarıhqa aınaldyratyn qyraǵy fototilshi – kez kelgen basylymnyń baǵy. «Jaqsy tańdalǵan taqyryp – jarty maqala» degendeı, keıde baspasózde jaryq kórgen bir ǵana sátti sýret jýrnalısiń jazǵan dúnıesin jarqyratyp jiberetini bar. Qazaq basylymdaryn qaldyrmaı oqıtyn oıly oqyrman Samat Qusaıynovtyń esim-soıyna qanyq dep bilemiz. Shırek ǵasyrdan beri qolynan fotoaparaty túspeı kele jatqan áriptesimiz jaqynda baýyrlas Túrkıa memleketinde jeke fotokórmesin ótkizip qaıtty.
Ómirin fotoónermen egiz órgen aǵaıydy Samat, Maqsat, Azamat Qusaıynovtar – elimizdiń beldi basylymdarynda qyzmet etip júrgen tanymal fototilshiler. Búgingi áńgimeniń ózegi fotoóner álemine alǵash qadam basqan úıdiń úlkeni – Samat Qusaıynov. Onyń obektıvine ilingen taqyryptardyń aıasy keń. Qazaq halqynyń ádet-ǵurpy, salt-sanasy, dala dástúri, ulttyq oıyndary men qonaqjaılyǵyn arqaý etken myńdaǵan sýrettiń óne boıynan óz isin qulaı súıgen sheberdiń qoltańbasyn kóresiz. «Ana tili», «Qazaq ádebıeti» «Ádebıet aıdyny», «Saqshy», «Prezıdent jáne halyq», «Almaty aqshamy» gazetterinde, «Parasat», «Aıgólek», «Altyn besik» jýrnaldardarynda tabandy qyzmet etken «Aqparat salasynyń úzdigi» jemisti eńbegi úshin Prezıdenttiń Alǵys hatymen marapattaldy.
Qyraǵy fotograftyń jumystary tek elimizde ǵana emes, Germanıanyń Shtýtgard, Túrkıanyń Ystanbul, Ońtústik Koreıanyń Tegý qalalarynda kórmege qoıylǵan. Qazaq dalasynyń baı tabıǵatyn pash etetin týyndylarynyń taǵy bir legi taıaýda Túrkıanyń «Anadoly órkenıetteri murajaıynda» saltanat qurǵan «Uly dala mádenıeti» kórmesi arqyly týysqan halyqtarǵa jol tartty.
– Meniń maqsatym – qazaq mádenıetin, ulttyq oıyndardy, ádet-ǵurypty sýret óneri arqyly dáripteý. Túrki memleketteriniń yntymaqtastyǵyn tý etken shara TÚRKSOI uıymynyń jáne ózim qyzmet etip júrgen «AIatau Aqparat» medıaholdınginiń qoldaýymen ótti. Sýretterimde túbi bir týysqan halyqtarǵa ortaq qundylyqtardy da kórsetýge tyrystym. Fotosýret – árbir sátti ustaý. Biraz jyl buryn Astanadaǵy Ulttyq kitaphanada «Saıyn dalanyń – salt dástúri» dep atalǵan fotokórmemdi ótkizdim. Sol kórmege kelgen sheteldikterdiń qyzyǵýshylyǵyn kórip, taǵy da shabyt ala tústim. Jýrnalıs árbir maqalany ashý úshin qalaı izdenetin bolsa, fotografıa da úlken izdenisti qajet etedi. Bir sýretpen bir maqalany ashýǵa bolady. Fotoaparattyń ishinen, obektıvtiń ar jaǵynan ómirdi kórip turýyń kerek. Meniń uǵymymda sýretke túsirý – óner. Sýretke túsirgen kezde adamnyń portretinen tiri dúnıe shyǵarýyń qajet. Peızaj ben portret janyma jaqyn janrlar, – deıdi S.Qusaıynov.
Únemi izdenis ústinde júretin fotogerdiń «Sarysýdyń syrly sýreti», «Sarysý saıaly mekenim», «Mereıli ólke – Moıynqum» atty foto jınaqtary kópshilikke jol tartty. Sákeńniń jeke prodúserligimen jaryq kórgen «30-dan asyp baramyn», «Bizdi kúter bir baqyt» tolyq metrajdy fılmderi de – úlken eńbektiń jemisi. Erdiń jasy elýdi eńsergen áriptesimizge tolaıym tabys tileımiz!
ALMATY
https://egemen.kz/article/379523-samattynh-syrly-suretteri