Almaty ákimi Baqytjan Saǵyntaev Samal-3 shaǵynaýdany turǵyndarynyń jańa turǵyn úı keshenin salýǵa qatysty shaǵymyna jaýap berdi, dep habarlaıdy Almaty-akshamy.kz Tengrinews.kz -ke silteme jasap.
Shaǵynaýdan turǵyndary buǵan deıin qurylysty toqtatý úshin sheneýniktermen birneshe ret kezdesý uıymdastyrǵan. Sodan keıin olar qala ákiminen turǵyn úı kesheni ornyna kelip, jaǵdaıǵa aralasýyn surady.
«Almaty qalasy ákiminiń tapsyrmasy boıynsha Meńdiqulov kóshesinde júk kótergish kólikterdiń ótýine tyıym salynǵany týraly belgi qoıylady, sondaı-aq, Samal-3 shaǵynaýdany, 37/2, 37/3 ýchaskesi mekenjaıy boıynsha ornalasqan «Jastar turǵyn úı kesheni jerasty parkıngi, Halyqqa qyzmet kórsetýge arnalǵan turǵyn emes úı-jaılary bar» nysanynyń qurylys alańyna kirýdi jabý tapsyryldy. Qazirgi ýaqytta Almatynyń qala qurylysyn baqylaý basqarmasy joǵaryda kórsetilgen mekenjaı boıynsha nysanǵa kireberis pen shyǵaberiske beton bloktar qoıdy», - delingen Almaty ákimdiginiń habarlamasynda.
Buǵan deıin qurylys kompanıasynyń ókili turǵyn úı kesheniniń jeri byltyr satyp alynǵanyn jáne bul jerde jergilikti turǵyndar aıtqandaı eshqashan saıabaq bolmaǵanyn málimdedi. Onyń sózinshe, bul ýchaskege 2003 jyly «kóp páterli turǵyn úı kesheni men bıznes-ortalyq salý úshin» degen nysanaly maqsat berilgen.
Eske salaıyq, byltyr kúzde almatylyqtar Samal-3 shaǵynaýdanyndaǵy jalǵyz saıabaq ornyna turǵyn úı keshenin salýǵa shaǵymdanǵan bolatyn. Keıin qala ákimi Baqytjan Saǵyntaev turǵyndardyń ruqsatynsyz qurylysqa ruqsat bermeýdi tapsyrdy.
Bir aıdan keıin jergilikti turǵyndar saıabaqqa Qazaqstannyń Tuńǵysh Prezıdenti Nursultan Nazarbaevtyń esimin berýdi surady. Al osy jyldyń basynda qurylysshylar ýchaskege keıbir jumystar úshin ekskavator kirgizigisi keldi. Alaıda jergilikti turǵyndar buǵan jol bermedi.