Otbasylyq zorlyq-zombylyqtan qaza tapqan Saltanat Núkenovanyń esimi Qazaqstannyń eleýli tulǵalarynyń panteonyna engizildi, - dep habarlaıdy Aqshamnews.kz
Bul týraly marqumnyń aǵasy Aıtbek Amangeldi habarlaǵan.
Aıtbektiń aıtýynsha, ol anasymen birge Qostanaı oblysyndaǵy «Amangeldi» tarıhı-memorıaldyq keshenine arnaıy barǵan. Bul jerde memorıaldyq qabyrǵa men el tarıhyna eleýli úles qosqan tulǵalarǵa arnalǵan panteon ornalasqan.
"Osy panteonda Qazaqstan tarıhynda iz qaldyrǵan tulǵalardyń qatarynda Saltanattyń aty jazylǵan memorıaldyq taqta ornatyldy. Buǵan deıin biz Pavlodardan ákelingen topyraqty panteonǵa tabystaǵan edik, ol memorıalda kapsýla túrinde saqtaýly. Munda Saltanatty el tarıhyna áser etken tulǵalardyń qataryna qosypty", – dep jazdy Aıtbek Amangeldi áleýmettik jelidegi jazbasynda.
Eske sala ketsek, 2023 jyldyń 9 qarashasyna qaraǵan túni Saltanat Núkenova Astanadaǵy BAU meıramhanasynda burynǵy ulttyq ekonomıka mınıstri Qýandyq Bıshimbaevtyń qolynan qaza tapqan edi. Aýyr soqqyǵa jyǵylǵan Saltanat kóz jumdy.
2024 jyldyń 13 mamyrynda Astanada ótken sot prosesi barysynda Qýandyq Bıshimbaev óz jubaıyn azaptap óltirgeni úshin kináli dep tanylyp, 24 jylǵa bas bostandyǵynan aıyryldy.
Bul is Qazaqstan tarıhyndaǵy eń kóp talqylanǵan isterdiń biri boldy. Oǵan búkil el ǵana emes, sheteldik BAQ ta nazar aýdardy. Qoǵamda úlken serpilis týyp, áleýmettik jelilerde Saltanatty qoldaý aksıalary ótti. Osy oqıǵadan keıin turmystyq zorlyq-zombylyq máselesi burynǵydan da ótkir kóterile bastady. Áıel quqyǵyn qorǵaýshylar, zańgerler men belsendiler zańnamany kúsheıtýdi jáne otbasylyq zorlyq-zombylyqqa qarsy naqty sharalar qabyldaýdy talap etti.