Saıran kóli aýmaǵynda 124 qoqys jáshigi ornatyldy, - dep habarlaıdy Aqshamnews.kz.
Almaty qalasy Qoǵamdyq keńistikterdi damytý basqarmasynyń málimetinshe, Saıran sý qoımasynda demalys aımaǵyn kezeń-kezeńimen kóriktendirý jumystary júrgizilip jatyr. Aýmaǵy resmı túrde ashylmaǵan, nysan áli paıdalanýǵa berilmegen jáne kórkeıtýdiń birqatar elementi, sonyń ishinde qoqys jáshikteri men shaǵyn sáýlet pishinder ornatý satysynda tur. Barlyq qaıta jańartý kezeńderi aıaqtalǵan soń bul aýmaq qajetti ınfraqurylymmen tolyq jabdyqtalady: jaryqtandyrý, demalys aımaqtary jáne beınebaqylaý júıeleri qarastyrylǵan.
Kún saıyn Saıran kóliniń aýmaǵynda 40 qyzmetker tazalyq jumystaryn júrgizip, qoqys shyǵarý jumystaryn atqarady. Orta eseppen táýligine shamamen 5 tonna turmystyq qatty qaldyq shyǵarylady.
Kelýshilerdiń jaılylyǵy men sanıtarlyq tártipti saqtaý maqsatynda aýmaqqa 124 qoqys jáshigi ornatylǵan.
Saıran kóline kún saıyn 3–4 myń adam keledi.
Qoǵamdyq tártip pen qaýipsizdikti qamtamasyz etý maqsatynda Almaty qalasynyń Polısıa departamenti, Tótenshe jaǵdaılar departamenti jáne Qutqarý qyzmetiniń qyzmetkerleri kún saıyn halyqpen túsindirý jumystaryn júrgizip jatyr. Júzýge tyıym salynǵany týraly aqparat beretin qorshaý men eskertý belgileri ornatylǵan.
Qabyldanyp jatqan sharalarǵa qaramastan, qoǵamdyq tártiptiń buzylý faktileri áli de tirkelýde: azamattar kól aýmaǵyndaǵy tártip erejelerin buzyp, kógaldandyrý elementterine jáne shaǵyn sáýlet nysandarǵa zıan keltirýde, qoqys qaldyryp ketip jatyr.
Mundaı áreketter qurylys jáne kórkeıtý jumystaryn aıtarlyqtaı qıyndatyp, josparlanǵan sharalardyń iske asýyn baıaýlatady.
Osyǵan baılanysty, 2025 jyly 21 maýsymda saǵat 10:00-de Saıran sý qoımasynyń aýmaǵyn kórkeıtý jáne sanıtarlyq jaǵdaıyn saqtaý aıasynda sý aıdynyn jáne oǵan irgeles aýmaqty tazalaý boıynsha senbilik ótkizý josparlanǵan.
Sondaı-aq, basqarma qala turǵyndary men qonaqtaryn qoǵamdyq oryndarda mádenıet normalaryn saqtaýǵa, komýnaldyq qyzmetkerlerdiń eńbegine jáne qalalyq ortaǵa qurmetpen qaraýǵa shaqyrady. Tazalyqty saqtaý, kórkeıtý, kógaldandyrý jáne ınfraqurylym elementterin qorǵaý – ár adamnyń sanaly qatysýyn talap etetin ortaq jaýapkershilik.
Ekologıa men qoǵamdyq keńistikterge jaýapkershilikpen qaraý — bul Almaty qalasynda jaıly, qaýipsiz jáne tartymdy qalalyq ortany qalyptastyrýǵa árbir azamattyń qosqan úlesi. Kórkeıtý jáne ómir súrý sapasyn jaqsartý boıynsha júrgizilip jatqan jumystardyń nátıjelerin saqtaý jáne arttyrýǵa ortaq kúsh-jiger qajet.