Almatyda «Adal saılaý úshin» qozǵalysynyń bastamasymen «Azamattardyń saılaý quqyqtarynyń konstıtýsıalyq kepildikteri» taqyrybynda úkimettik emes uıymdardyń ókilderimen kezdesý ótti, dep habarlaıdy Almaty-akshamy.kz
Jıynǵa «Qoǵamdyq kelisim», «Qazaqstan jastary», «Assambleıa jastary», «Janashyr», «Danalyq» jáne ózge de úkimettik emes uıymdar, qoǵamdyq birlestikter men qozǵalystardyń ókilderi qatysty.
Jıyn barysynda aldaǵy saılaýdyń ádil ári zańǵa saı ótýi úshin ne istelýi kerektigi talqylandy. «Adal saılaý úshin» qozǵalysynyń Almaty qalasy boıynsha jetekshisi Baýyrjan Maqulbaev uıymnyń negizgi maqsaty men mindetterin aıtyp ótti:
«27 qyrkúıek kúni Qazaqstan zańgerler odaǵynyń shtabynda zań salasyna qatysy bar barlyq mamandardy biriktiretin «Adal saılaý úshin» qozǵalysy quryldy. Qozǵalystyń negizgi ustanymy – eshqandaı Prezıdenttikke úmitkerdi ne partıany qoldap nasıhattyq jumystar júrgizbeý. Biz saılaý prosesine tikeleı qatyspaı, biraq saılaýshylar men saılanýshylarǵa quqyqtyq kómek kórsetý maqsatyn ustanamyz», - dedi «Adal saılaý úshin» qozǵalysynyń Almaty qalasy boıynsha jetekshisi Baýyrjan Maqulbaev.
Sondaı-aq, ol úkimettik emes uıymdardy aldaǵy saılaýdyń barynsha ádil ótýi úshin belsendilik tanytýǵa shaqyrdy.
«Búgin qoǵamdyq birlestikterdi jınap, sizder arqyly qoǵamǵa áser etkimiz keledi. Qoǵamdyq birlestikter men qorlar saılaýdyń ádil ótýine úles qossa deımiz. Ár adam saılaýshy retindegi quqyǵyn bilip, ony qorǵaı alýy qajet. Sondyqtan adamdarǵa qajetti aqparatty jetkizýdi ótinemiz», – dedi «Adal saılaý úshin» qozǵalysynyń Almaty qalasy boıynsha jetekshisi Baýyrjan Maqulbaev.