Prezıdenttiń ózi munyń jaı emestigin aıtty.
Memleket basshysy Qasym-Jomart Toqaev kezekten tys prezıdent saılaýy jarıalanǵaly beri elimizge kıbershabýyl kúsheıgenin málimdedi, dep habarlaıdy Almaty-akshamy.kz Aqordaǵa silteme jasap.
Prezıdent saılaý naýqany kezinde el múddesine kereǵar pikir aıtatyn, tipti, jalǵan aqparat taratatyn adamdar paıda bolýy múmkin ekenin eskertip, halyqty saq bolýǵa úndedi.
Toqaev sońǵy kúnderi Qazaqstanǵa jasalyp jatqan kıbershabýyldardy aldaǵy kezekten tys prezıdent saılaýymen baılanystyrdy.
«Saılaý jarıalanǵan soń, túrli jalǵan derekter, aqparat, ıaǵnı feıkter taratylyp, kıbershabýyldar kúsheıdi. Bul jaıdan jaı emes. Keıbir kúshter shetelden osyndaı áreketterdi uıymdastyryp, el ishine iritki salýdy kózdeıdi. Olar Qazaqstanda oń ózgeristerge kedergi jasaǵysy keledi. Biraq biz baǵytymyzdan taımaımyz», - dedi ol Abaı oblysynyń jurtshylyǵymen kezdesýinde.
Aıtýynsha, bıyl jazda ótken referendým nátıjesi baǵdarymyzdyń durystyǵyn kórsetti. Jurtshylyq Ata zańǵa usynylǵan ózgeristerdi qoldady. Konstıtýsıalyq reforma saıası jańǵyrý jolyndaǵy mańyzdy qadam boldy.
«Bılik tarmaqtary arasyndaǵy tepe-teńdik nyǵaıa tústi. «Kúshti Prezıdent – yqpaldy Parlament – esep beretin Úkimet» qaǵıdaty ornyqty. Bul Prezıdenttik Respýblıka bolady degen sóz. Rasynda, el basqaratyn prezıdent quzyrly, kúshti bolýy kerek. Áıtpese, keıbir basqa elderdegi sıaqty tártipsizdikke ushyraýymyz múmkin. Al, ondaı jaǵdaı halqymyzǵa qasiret ákeledi», - dep sanaıdy Toqaev.
Memleket basshysy kelesi jyly májilis pen máslıhat depýtattary aralas júıe boıynsha saılanatynyn eske saldy.
Al óńir basshylary balamaly jolmen tańdalady. Aýyl ákimderin tikeleı saılaý tásili engizildi.
Sonymen qatar saıası partıalarǵa zań júzinde tyń múmkindikter berildi. Jurttyń memleketti basqarý isine atsalysýyna jol ashyldy, dedi prezıdent.
Aıta keteri, búgin Prezıdent Qasym-Jomart Toqaev jumys saparymen Abaı oblysyna bardy.
Eske salsaq, jýyrda Memlekettik tehnıkalyq qyzmet birneshe kúnnen beri qazaqstandyq ınternet segmenine kıbershabýyldar jasalyp jatqanyn habarlady.
Vedomstvo málimetinshe, maqsatty kıbershabýyldar eldiń memlekettik organdaryna jáne Qaznettiń ınfraqurylymyna baǵyttalǵan. Kıbershabýyl saldarynan ınternet baılanysynyń nasharlaýy baıqalady.