Jańa partıalardyń qúurylýyna jaǵdaı jasalady.
Prezıdenttiń birqatar ókilettikten bas tartýy saıası kúshterdiń arasyndaǵy básekelestiktiń deńeıin kóteredi. Bul týraly QR Konstıtýsıalyq keńesiniń apparat basshysy Baqyt Nurmuhanov aıtty, dep habarlaıdy Almaty-akshamy.kz QazAqparatqa silteme jasap.
«Birinshi - sýperprezıdenttik basqarý júıesinen prezıdenttik basqarý júıesine kóshý. Ol degenimiz ne? Bizde prezıdenttik basqarý júıesi qoldanystaǵy Konstıtýsıa qabyldanǵan kezde engizildi. Kúshti prezıdenttik bılik Táýelsizdiktiń basynda ártúrli salalarda túbegeıli reformalar júrgizýge qajet boldy. Biraq kóp ýaqyt ótpeı-aq 1998, 2007, 2017 jyldary ótkizilgen konstıtýsıalyq reformalar barysynda Memleket basshysynyń ókilettikteri birtindep basqa memlekettik organdarǵa berile bastady. Sol úrdis qazirgi 4-shi konstıtsıalyq reformada jalǵasyn taýyp otyr. Prezıdenttiń birqatar ókilettikten bas tartýy, saıası partıadaǵy músheligin toqtatýy elimizdegi saıası kúshterdiń arasyndaǵy básekelestiktiń deńeıin kóterýge múmkindik beredi. Jalpy bul Konstıtýsıaǵa engizilip jatqan ózgeristerdi Joldaýda aıtylǵan basqa da ózgeristermen júıeli túrde qarastyrǵan jón», - dedi ol Ortalyq komýnıkasıalar qyzmetindegi baspasóz máslıhatynda.
Onyń atap ótýinshe, Prezıdent tek qana saıası partıadan shyǵyp qana qoıǵan joq, sonymen qatar saıası partıalardy qurýǵa qoıylatyn talaptardy edáýir jeńildetip jatyr. Máselen, buryn saıası partıa qurý úshin onyń músheleri 50 myń bolý kerek bolsa, keıinnen 40 myńǵa, byltyr 20 myńǵa, al qazir 5 myńǵa deıin tómendetildi. Iaǵnı, jańa partıalardyń qúurylýyna jaǵdaı jasalady.
«Kúshti Prezıdent, yqpaldy Parlament, esep beretin Úkimet» qaǵıdasynyń aıasynda ókildi memlekettik bılik organdarynyń mártebesi, ókilettikteri kúsheıtilmek. Oǵan Parlament, máslıhattar jatady. Parlament shyn máninde zań shyǵarýshy, halyqtyń múddesin qorǵaıtyn ókildi organ retinde qurylýy úshin qos palatanyń da tártibi, jumys prınsıpteri ózgertilip jatyr. Onyń ishinde Senattaǵy Prezıdent taǵaıyndaıtyn depýtattardyń sany qysqartylyp, Qazaqstan halqy Assambleıasynyń kvotasy Májilisten Senatqa aýystyryldy. Ol degen Assambleıadan taǵaıyndalatyn 5 depýtat jalpy memlekettik múddelermen qatar Qazaqstanda turatyn 100-den asa halyqtyń múddeleri men quqyqtaryn bildiretin bolady», - dedi Baqyt Nurmuhanov.