Memleket basshysynyń tapsyrmasymen Bas prokýratýra 18 maýsymda Kıev qalasynda jýrnalıs Aıdos Sadyqovqa jasalǵan qastandyq deregi boıynsha qylmystyq is qozǵaǵanyn habarlady.
Ýkraınanyń quqyq qorǵaý organdary jedeldigi men kásibıligin kórsetip, qysqa merzimde qylmysty jasaǵan tulǵalardy anyqtady.
«Bas prokýratýra Ýkraınanyń quziretti organdaryna Jaqanbaev pen Qarataevtyń jasalǵan qylmysqa qatysy týraly qylmystyq istiń materıaldaryn berý jóninde halyqaralyq tergeý tapsyrmasyn joldady. 21 maýsymda Altaı Jaqanbaev Qazaqstan Respýblıkasynyń ishki ister organdaryna óz betinshe habarlasyp, istiń mán-jaıy boıynsha jaýap berdi. Sol kúni ol osy qylmysty jasady degen kúdikpen ustaldy», – dep habarlady vedomstvodan.
Meıram Qarataevtyń qaıda júrgenin anyqtaý úshin jedel izdestirý sharalary júrip jatyr.
«Tergeý múddesi úshin ózge aqparat jarıalanbaıdy», – dep eskertti Bas prokýratýra.
Eske sala keteıik, 18 maýsymda Kıevte turatyn jýrnalıs Aıdos Sadyqovty úıiniń janynda áldebireý atyp ketkenin jazǵan edik.