Almatylyqtarǵa «Azamattarǵa arnalǵan úkimettiń» alǵashqy kýálikteri tabys etildi
AHAJ organdardyń fýnksıalary aǵymdaǵy jylǵy 1 shildeden bastap «Azamattarǵa arnalǵan úkimet» memlekettik korporasıasy» komersıalyq emes aksıonerlik qoǵamyna berildi. Osyǵan baılanysty, «Azamattarǵa arnalǵan úkimet» memlekettik korporasıasynyń Almaty fılıalynda AHAJ jelisi boıynsha alǵashqy memlekettik qyzmet alýshylardy quttyqtady, dep habarlaıdy almaty-akshamy.kz
Memlekettik korporasıa fılıalynyń basshylyǵynyń qatysýymen Almaty qalasynyń aýdandyq AHAJ bólimderinde Astana kúnine, sondaı-aq AHAJ fýnksıalaryn «Azamattarǵa arnalǵan úkimet» memlekettik korporasıasyna ótýine oraılastyrylǵan shara ótti.
Fılıal dırektorynyń orynbasary Farıda Bókıjanova «Neke jáne balanyń týý týraly» kýálikterin tuńǵysh alýshylardy quttyqtap, olarǵa memlekettik korporasıanyń Basqarma tóraǵasy Súıenish Ábdildınniń atynan quttyqtaý hat pen estelik syılyqtar tabys etti.
«Búgin Almaly jáne Medeý aýdanynyń AHAJ bólimderinde jas jubaılar men sábıli bolǵan ata-analardy quttyqtadyq. Olar Memlekettik korporasıanyń eltańbaly móri qoıylǵan «Neke kýálikteri men balanyń týýy týraly» kýáliktiń tuńǵysh ıegerleri atandy. Sondaı-aq, jas jubaılarǵa gúl shoqtary men jańa týǵan náresteler úshin jumsaq oıynshyqtar tabystaldy. Osylaısha, búgin ondaǵan qala turǵyndarynyń otbasylyq tarıhy taǵy bir qyzyqty oqıǵamen tolyqtyryldy. Olar bul týraly balalaryna, nemerelerine, shóberelerine aıtatyn bolady», - dedi «Azamattarǵa arnalǵan úkimet» memlekettik korporasıasy Almaty qalasy fılıaly dırektorynyń orynbasary Farıda Bókıjanova.
AHAJ fýnksıalarynyń aýysýymen qyzmetterdi alý tártibi ózgermegenin atap ótkenimiz jón. Nekege turýǵa ótinishter burynǵysynsha elektrondyq úkimettiń e-gov. kz. veb-portaly arqyly elektrondy túrde beriledi. Qalaýyńyz boıynsha neke qıýdy saltanatty jaǵdaıda ótkizýge bolady.
Esterińizge sala keteıik, AHAJ qyzmetterin tek tirkeýshi organnyń qyzmetkerleri ǵana kórsetetin bolady. Qoldanystaǵy memlekettik qyzmetter standarttary, qyzmet kórsetý tártibi men merzimderi de ádettegideı.
AHAJ-dyń barlyq áleýmettik mańyzdy qyzmetteri - týýdy, ólimdi memlekettik tirkeý tegin. Aqyly qyzmetter qosylǵan qun salyǵyn eskere otyryp esepteledi.
Ótken jyly azamattyq hal aktilerin tirkeý organdary (AHAT) 100 jyldyq mereıtoıyn atap ótti. Adamnyń týǵanynan bastap, ómiriniń sońyna deıingi aıtýly sátteriniń kýási bolatyn AHAJ bólimderiniń jumysy, qandaı formada bolsa da áli de ǵasyrlar boıy jasaı bereri sózsiz.