Shyǵynnyń jalpy somasy shamamen 30 mlrd teńgeni qurady.
Qazaqstan Premer-Mınıstriniń birinshi orynbasary Roman Sklár qańtar oqıǵasy kezinde nuqsan kelgen nysandar qashan qalpyna keltiriletinin aıtty, dep habarlaıdy Almaty-akshamy.kz QazAqparatqa silteme jasap.
«Úkimet jergilikti atqarýshy organdarmen jáne uıymdarmen birlese otyryp, tártipsizdik kezinde zardap shekken memlekettik organdardyń nysandaryn qalpyna keltirý jáne kásipkerlik sýbektilerine keltirilgen zalaldy óteý boıynsha jumys júrgizýde. Qańtar oqıǵasy kezinde elimizdiń 8 oblysynda memlekettik organdardyń 42 ǵımaraty zardap shekti. Bul - Almaty, Shymkent, Jambyl, Qyzylorda, Atyraý, Aqtóbe jáne Shyǵys Qazaqstan oblystarynyń qalalary. Keltirilgen shyǵynnyń jalpy somasy shamamen 30 mlrd teńgeni qurady. Onyń ishinde 28 mlrd teńge respýblıkalyq búdjetten 18 nysandy qalpyna keltirýge jumsaldy», - dedi Úkimet basshysynyń birinshi orynbasary.
Sondaı-aq, ol búkil nysandarǵa tehnıkalyq baıqaý júrgizilgenin atap ótti.
«Nátıjesinde 28 aǵymdaǵy jóndeý, sondaı-aq 14 ǵımaratqa kúrdeli jóndeý jáne qaıta jaraqtaý qajet ekeni anyqtaldy.Búgingi tańda 21 nysanda aǵymdaǵy jóndeý jumystary aıaqtaldy. Naýryz aıynyń sońyna deıin 5 ǵımaratqa, qalǵan 2 nysanǵa mamyr jáne maýsym aılarynda jóndeý jumystary júrgiziledi. Kúrdeli jóndeý jáne qaıta jaraqtaýdy qajet etetin 14 memlekettik nysan boıynsha jumystar júrgizilýde. Kestege sáıkes, 7 ǵımarat boıynsha jumystar naýryz aıynda, 5 nysan boıynsha aǵymdaǵy jyldyń maýsym aıynda aıaqtalady», - dedi Roman Sklár.