Bul týraly Parlament Májilisiniń jalpy otyrysynda Bas prokýror Berik Asylov málimdedi
Bas prokýror Berik Asylov Memleket basshysynyń quqyq qorǵaý jáne arnaýly organdarǵa, qańtar oqıǵasynyń sebepterin egjeı-tegjeıli tergep-tekserýdi tapsyrǵanyn aıtty, dep habarlaıdy Almaty-akshamy.kz
«Atalǵan faktiler boıynsha, barlyǵy 3 770 qylmystyq is qozǵaldy. Basym bóligi, İshki ister mınıstrliginiń óndirisinde, olar – adam óltirý, urlyq, qaraqshylyq, buzaqylyq, qarý urlaý. Sybaılas jemqorlyqqa qarsy qyzmet, tergeýdiń zańsyz tásilderin qoldaný faktileri boıynsha 234 isti júrgizýde», – dep atap ótti Bas prokýror.
Sonymen qatar ol Ulttyq qaýipsizdik komıteti qandaı isterdi tergep jatqanyna toqtaldy.
«Ulttyq qaýipsizdik komıteti memleketke opasyzdyq jasaý, bılikti basyp alýǵa áreket etý jáne asa iri mólsherde para alý boıynsha 15 isti tergeýde. Bul ister boıynsha, Ulttyq qaýipsizdik komıtetiniń burynǵy tóraǵasy Másimov jáne onyń 3 orynbasary, sot sanksıasymen qamaýǵa alyndy. Osy organnyń taǵy 2 basshysy, bılikti asyra paıdalaný kúdigimen, qylmystyq jaýaptylyqqa tartylýda. Ulttyq qaýipsizdik komıtetiniń isterine «óte qupıa» degen belgi berildi. Osyǵan oraı tergeý nátıjelerin jan-jaqty jarıa ete almaımyz», - dedi Berik Asylov.