Májilis depýtaty Rınat Zaıyt aqparat jáne qoǵamdyq damý vıse-mınıstri Qanat Ysqaqovke kórkem shyǵarmalardaǵy beıpil sózderge qatysty suraq jolady, - dep habarlaıdy aqshamnews.kz tilshisi.
"Bir-aq nárseni bilgim keledi. Kórkem shyǵarma degen bolady. Qazir sizder qyzdy-qyzdymen "ana-mynany toqtatý kerek" dep jatyrsyzdar. Kelisemin, boqtyq aıtýǵa bolmaıdy. Biraq erteń "bir túnde 7-8 qyzdy alyp qashtym" dep án aıtqan meniń jasymdaǵy jigitterdi sottap júrmeımiz be? "Eger men shyn súısem, asyl erkem, erteń keshke jdaıyn tur, qashý ońaı" degen halyq áni bar. Mundaı saraptamany kim jasaıdy. Quzireti bar adamdar ma? Olardy biz tanımyz ba? Ekinshiden, kórkem shyǵarmalardy qalaı qorǵaısyzdar? Erteń fólklorymyzdan aıyrylyp qalyp júrmeıik", - dedi ol.
"Ondaı ánderdi aıtý úshin Iman Júsip bolýymyz kerek" dep ázildedi Májilis tóraǵasy Erlan Qoshanov.
Aqparat jáne qoǵamdyq damý vıse-mınıstri Qanat Ysqaqov saraptamany kim júrgizetinin aıtty.
"Eń aldymen, bizde Konstıtýsıa boıynsha senzýraǵa tyıym salynǵan. Ekinshiden, shyǵarmashylyq erkindik zańǵa qaıshy bolmasa, biz qoldaımyz. Sondyqtan saraptamany quqyq qorǵaý organdary ótkizbeıdi, ony bizdiń shyǵarmashylyq top qaraıdy. Kórkem shyǵarmalarǵa kelsek, sújet degen nárse bar. Onyń bárin qaraımyz. Eger zańǵa qarsy nárseler kórinse, ony rejıserge aıtyp, túzetý jumystary ǵana júrgiziledi. Al bylaı jaýapqa tartý degen joq", - dedi ol.
Eske salaıyq, buǵan deıin endi án mátininde zorlyq-zombylyqqa nemese alyp qashýǵa shaqyratyn sózderi bar týyndynyń avtory tekseriletini aıtylǵan edi. İshki ister mınıstrligi ondaı ánderdiń árqaısyna quqyq turǵysynan baǵa berýge daıyn.