Qazaqstan-Brıtan tehnıkalyq ýnıversıtetiniń ál-Farabı atyndaǵy kishi zalynda Respýblıka kúnine arnalǵan ǵylymı-praktıkalyq konferensıa ótti.
Respýblıka kúnine arnalǵan konferensıaǵa Almaty ákiminiń orynbasary Arman Qyryqbaev, Almaty qalalyq ardagerler keńesiniń tóraǵasy Ahan Bıjanov, Hİİ shaqyrylǵan Qazaq KSR Joǵary Keńesiniń burynǵy depýtattary, Almaty qalalyq máslıhat depýtattary jáne ózge qazaq zıalylary qatysty. Konferensıa barysynda 1990 jyly 25 qazanda «Memlekettik egemendik týraly» deklarasıanyń qalaı qabyldanǵany eske alynyp, aldaǵy Respýblıka kúnin atap ótýdiń mańyzy talqylandy.
«1990 jyly 25 qazanda Qazaqstannyń egemendigi týraly deklarasıa qabyldandy. Ol Respýblıkamyzdyń táýelsizdigine jasalǵan alǵashqy qadam boldy, sol sátten elimizdiń jańa tarıhy bastaldy. Azattyq, táýelsizdik, egemendik kez kelgen ult úshin eń qymbat mura. Sol turǵydan deklarasıa elimizdiń egemendigi men táýelsiz memleket retinde Qazaqstannyń saıası-quqyqtyq negizderin jarıalady», – dedi Almaty qalalyq ardagerler keńesiniń tóraǵasy Ahan Bıjanov.
Konferensıada alǵy sóz aıtylǵan soń, barlyq jıyn qatysýshylaryn Almaty ákiminiń orynbasary Arman Qyryqbaev alda kele jatqan Respýblıka kúnimen quttyqtady.
«Alataýdyń baýraıyndaǵy ásem qalamyz Almatyda 1990 jyly Qazaqstannyń egemendigi týraly deklarasıa qabyldanyp, elimizdiń shynaıy táýelsizdigine jol ashylady. Ata-babalarymyzǵa ǵasyrlar boıy arman bolǵan egemendikke qadam basqan bul kún arnaıy mereke bolyp belgilendi. Qasym-Jomart Toqaevtyń Jarlyǵymen oǵan ulttyq naqysh berildi, arnaıy zań qabyldandy. Barshańyzdy kele jatqan Respýblıka kúnimen shyn júrekten quttyqtaımyn», – dedi Almaty ákiminiń orynbasary Arman Qyryqbaev.
Deklarasıanyń qabyldanýyna úles qosyp, osynaý tarıhı sáttiń bastaýynda bolǵan Hİİ shaqyrylǵan Qazaq KSR Joǵary Keńesiniń burynǵy depýtattary da óz estelikterimen bólisti.
«Deklarasıany qabyldaǵanda 360 depýtat boldy, ońaı emes qoı? Bul demokratıalyq proses bastalǵan ýaqyt. Árıne, kópshiligi ony qoldap daýys berse de, biraq 18 adam qarsy boldy. Mine, ol kezderi sondaı tolqý boldy. Sonda deklarasıa qabyldanǵanda bir-birimizge qarasaq, kózimizden jas shyǵyp tur. Endi ata-babanyń armany kelip otyr ǵoı. Táýelsizdikke degen eń úlken qadam osy bizdiń», – dedi Hİİ shaqyrylǵan Qazaq KSR Joǵary Keńesiniń burynǵy depýtaty Sábden Orazaly.
Sondaı-aq, Qazaqstan-Brıtan tehnıkalyq ýnıversıtetiniń stýdentteri kóshege Tý ustap shyǵyp, Respýblıka kúnine oraı Kók Tý aksıasyn ótkizdi.
