Almatyda Respýblıka kúni qalaı merekelenedi?
Óńirlik komýnıkasıalar qyzmetiniń alańynda ótken brıfıńke qatysqan Almaty qalalyq qoǵamdyq damý basqarmasynyń basshysy Aıdar Esenbekov Respýblıka kúnine oraı qandaı sharalar ótetini týraly aıtyp berdi, dep habarlaıdy Almaty-akshamy.kz.
Aıdar Esenbekov sózin Memleket basshysynyń tapsyrmasymen bıylǵy jyly «Qazaqstan Respýblıkasyndaǵy merekeler týraly» zańǵa ózgerister men tolyqtyrýlar engizilgenin eske salýdan bastady. Zańǵa sáıkes, 25 qazan – Respýblıka kúni ulttyq mereke bolyp belgilendi.
Bıyl bul mereke Almatyda keńinen atalyp ótilmek, is-sharalar jospary ázirlenip, bekitildi. Bul - ártúrli saltanatty jıyndar, konsertter, memlekettik nagradalar tabystalady, sporttyq jarystar, ǵylymı konferensıalar, dóńgelek ústelder, shyǵarmashylyq baıqaýlar, taqyryptyq kórmeler, ekologıalyq is-sharalar, jármeńkeler jáne t.b.
« İs-sharalardyń bir bóligi ótti, mysaly, 7 qazanda Qazaqstan halqy Assambleıasy Respýblıkalyq Analar keńesiniń keńeıtilgen otyrysy ótti. Al 15 qazan kúni Jeltoqsan saıabaǵynda jeltoqsandyqtardyń, volonterlerdiń jáne «Assambleıa jastary» Almaty qalasy ókildigi músheleriniń qatysýymen senbilik ótti. 1000-nan astam aǵash otyrǵyzylyp, saıabaqtyń irgeles aýmaǵyna sanıtarlyq tazalaý jumystary júrgizildi», — dedi A.Esenbekov.
Shara qonaqtaryna qyzyqty konserttik baǵdarlama usynylyp, ulttyq sport túrlerinen jarystar ótkizildi. Taǵamdar da ázirlendi.
15-16 qazanda Sh.Ýálıhanov atyndaǵy alańda Shyǵys Qazaqstan jáne Abaı oblystarynyń aýyl sharýashylyǵy taýar óndirýshileriniń jármeńkesi ótti. 17 qazanda orta bilim berý uıymdarynyń 8-11 synyp oqýshylary arasynda «Atameken» jalpyrespýblıkalyq patrıottyq dıktant baıqaýy ótti. Ony jazýǵa 210 bilim berý oryndarynyń stýdentteri qatysty.
Sonymen qatar, qalanyń barlyq murajaılary men kitaphanalarynda Respýblıka kúni taqyrybyna arnalǵan kórmeler uıymdastyryldy. Respýblıka kúnin merekeleý aıasynda qalany kórneki bezendirý jumystary júrgizildi. Taqyryptyq quttyqtaýlar qalanyń LED-ekrandary men bılbordtarynda ornalastyrylǵan.
«Mereke qarsańyndaǵy kúnderi Respýblıka kúnine arnalǵan «Týǵan Qazaqstanymdy maqtan tutamyn» chellendji bastaldy. Barlyǵy 25 beınerolık daıyndaldy, onda QHA jastarynyń 25 ókili qalanyń kórikti jerleri fonynda elge, qalaǵa degen patrıottyq sezimderin aıtty», - dep jalǵastyrdy A.Esenbekov.
Búgin, 21 qazanda Jumyspen qamtý jáne áleýmettik baǵdarlamalar, Jastar saıasaty jáne kásipkerlik jáne ınvestısıa basqarmalary demeýshiler men janashyr jandarmen birlese otyryp, «Janashyr júrek» qaıyrymdylyq aksıasy bastaldy.
Sondaı-aq ÓKQ spıkeri Uly Otan soǵysy ardagerlerin qoldaý aksıasyna Almaty qalalyq «Assambleıa Jastary» ókilderi qatysqanyn aıtty. Assambleıa jastary «UOS ardagerleri, tyl eńbekkerleri jáne soǵys balalary keńesi» qoǵamdyq qorymen birlese otyryp, ardagerlerge azyq-túlik paketterin jetkizýdi uıymdastyrdy.
Búgin QBTÝ zalynda Respýblıka kúnine arnalǵan ǵylymı-tájirıbelik konferensıa ótti. Sharaǵa Qazaq KSR Joǵarǵy Keńesiniń Hİİ shaqyrylymynda saılanǵan depýtattary, kórnekti ǵalymdar men sarapshylar qatysty.
Almaty qalalyq mádenıet basqarmasy basshysynyń orynbasary Naılá Mýlúkova Respýblıka kúnine arnalǵan aldaǵy sharalarǵa toqtaldy.
Máselen, 22 qazan kúni saǵat 12.00-de QBTÝ-dyń úlken zalynda qala ákiminiń qatysýymen Almaty qalasynyń turǵyndarynyń memlekettik nagradalaryn, alǵys hattaryn tapsyrý saltanatty rásimi josparlanǵan. Al keshki saǵat 17.00-de qazaq estrada juldyzdarynyń qatysýymen úlken konsert josparlanǵan. Árbir nómirde Qazaqstan tarıhynan syr shertetin teatrlandyrylǵan qoıylymdar kórsetiledi. Tolyq konsertti 25 qazanda «Almaty» telearnasynan kórýge bolady.
«25 qazanda saǵat 11:30-da «Medeý» SK alańynda memlekettik týdyń saltanatty kóterilýi ótedi jáne Qazaqstan Respýblıkasynyń ánurany jappaı oryndalady. Dál osy kúni Astana alańynda jappaı keshki merekeler men merekelik konsert ótedi», - dedi N.Mýlúkova.
Sonymen birge, Respýblıka kúnin merekeleý aıasynda qalanyń barlyq aýdandarynda saltanatty jıyndar, Qazaqstan Respýblıkasynyń Ánurany oryndalady, jappaı merekelik sharalar is-sharalar,, dóńgelek ústelder, t.b. ótedi. Respýblıka kúnin merekeleý aıasynda qalada barlyǵy 400-den astam túrli is-shara ótedi.
Úlken is-shara 25 qazan kúni saǵat 17:00-de «Astana» alańynda qazaq estrada juldyzdarynyń qatysýymen ótedi. Hedlaınerlerdiń qatarynda Alashuly, Ulytaý, Mádına Sádýaqasova, Búrkit pen Aısha, Dınaıa, Lýına, Álisher Kárimov, Asqat Tarǵynov, t.b. bar. Konsert saǵat 21.00-ge deıin jalǵasady, odan keıin almatylyqtar otshashýdy tamashalaı alady.