Almatyda Respýblıka kúnin toılaýǵa arnalǵan is-sharalar 20 qazan kúni «ALMATY PUPPET FESTIVAL» I Halyqaralyq qýyrshaq teatrlary festıvaliniń saltanatty ashylýymen bastaldy. Festıvál 24 qazanǵa deıin jalǵasady, memlekettik qýyrshaq teatrynyń sahnasynda jas kórermenderge Qazaqstannyń túkpir-túkpirinen, sonymen qatar, alys-jaqyn shetelderden – Ózbekstan, Polsha, Bolgarıa, Grýzıa, Túrkıadan kelgen teatr ujymy óner kórsetedi.
- 24 qazanda Respýblıka kúnine oraı saǵat 10:00-de Ortalyq mádenıet jáne demalys saıabaǵynda skandınavıalyq serýendeý qalalyq festıvali ótedi, oǵan belsendi uzaq ómir súrý ortalyqtarynan zeınetker komandalary qatysady. Festıvál baǵdarlamasy boıynsha skandınavıalyq serýendeý boıynsha kórsetilimder, konserttik baǵdarlama, shyǵarmashylyq kórme, sonymen birge, festıvál qatysýshylaryn dıplomdarmen marapattaý rásimi ótedi.
Buǵan qosa, 24-25 qazan kúnderi Jibek joly dańǵylynda, Panfılov pen Báıseıitova kósheleriniń arasynda saǵat 10:00-den 18:00-ge deıin qolónershiler jármeńkesi ótedi. Jármeńkede Qazaqstan, Ózbekstan jáne Qyrǵyzstan sheberleri qoldan jasaǵan buıymdaryn usynady.
Respýblıka kúni, 25 qazanda saǵat 10:30-da «Medeý» BTSK-da memlekettik týdy kóterý jáne Qazaqstan Ánuranyn jappaı oryndaý saltanatty rásimi ótedi. İs-sharaǵa qala jastary, qoǵam qaıratkerleri, Almaty qalasy máslıhatynyń depýtattary jáne Qazaqstan halqy Assambleıasynyń ókilderi qatysady. Sonymen qatar, memlekettik týdy kóterý jáne Qazaqstan Ánuranyn jappaı oryndaý qalanyń barlyq aýdanynda ótedi.
Sporttyq is-sharalarǵa kelsek, 25 qazan kúni saǵat 10:00-den 18:00-ge deıin sporttyq-jattyǵý kesheninde shaǵyn fýtbol, voleıbol jáne dzúdodan, sonymen qatar, ál-Farabı atyndaǵy QazUÝ-da ústel tenısi jáne qazaq kúresinen sporttyq festıvál ótedi. Sonymen birge, Balýan Sholaq atyndaǵy sport saraıynda saǵat 15:00-den 18:00-ge deıin qazaqstandyq estrada juldyzdarynyń qatysýymen qazaq kúresinen «Óner barysy» týrnıri ótedi.