Almaty qalasy «Perınatologıa jáne balalar kardıohırýrgıasy ortalyǵy» bazasynda Almaty qalasyn damytý baǵdarlamasynyń Jol kartasyna sáıkes, «AYALA» qaıyrymdylyq qorynyń jetekshiligimen RF eńbek sińirgen dárigeri, medısına ǵylymdarynyń doktory, profesor, RF Densaýlyq saqtaý mınıstrliginiń Soltústik-Batys federaldyq okrýgi boıynsha bas akýsher-gınekology, D.O.Ott atyndaǵy AGjR ǴZI bas ǵylymı qyzmetkeri, Sankt-Peterbýrg qalasy №17 perzenthanasynyń bas dárigeri Mıhaılov Anton Valerevıch Almaty qalasynyń akýsher-gınekologtary, últradybystyq dárigerleri úshin akýsherlik jáne perınatologıanyń ózekti máseleleri boıynsha biregeı jáne tanymdyq sheberlik sabaǵyn ótkizdi.
İs-sharany ashqan Almaty qalasy Qoǵamdyq densaýlyq saqtaý basqarmasy basshysynyń orynbasary Imanǵalıeva Nazgúl Melısqyzy ana men bala densaýlyǵy elimizdiń bolashaq áleýetiniń negizin quraıtynyn atap ótti. Sondyqtan ana men bala densaýlyǵyn saqtaý, týý kórsetkishin arttyrý, sondaı-aq ana men bala ólimin azaıtý elimizdiń memlekettik saıasatynyń eń mańyzdy baǵyty, dep habarlaıdy Almaty-akshamy.kz.
Almaty qalasy ákimdiginiń qoldaýymen «Qalany damytýdyń jol kartasy» baǵdarlamasyn júzege asyrý aıasynda dárigerler jaqyn jáne alys shetelde úzdiksiz bilim alyp jatyr, medısınalyq qyzmet kórsetý sapasyn arttyrý úshin halyqaralyq ozyq tájirıbeni engizip otyr. Atalǵan sheberlik synyby Almaty qalasyndaǵy akýsherlik, gınekologıa jáne balalarǵa qyzmet kórsetýdi odan ári jaqsartýǵa qundy úles qosady.
«Perınatologıa jáne balalar kardıohırýrgıasy ortalyǵy» memlekettik kásipornynyń dırektory Nurlanova Gúlnar Qaztaıqyzy: «Ortalyq 13 jyl boıy júkti áıelderge, bosanatyn áıelderge, jańa týǵan náresteler men týa bitken júrek aqaýy bar balalarǵa joǵary mamandandyrylǵan medısınalyq kómek kórsetedi. Ortalyq Italıa, Izraıl, Koreıa jáne Reseıdiń jetekshi klınıkalarymen jumys isteıdi, qyzmetkerlerdiń biliktiligin arttyrý úshin túrli elden kelgen dárigerlerdiń qatysýymen kóptegen sheberlik sabaǵy ótkiziledi.
Ortalyqta 2022 jyly 8206 bala dúnıege keldi, onyń 840-y shala týdy. Uryqtyń týa bitken aqaýyn der kezinde dıagnostıkalaý maqsatynda 2022 jyldyń qyrkúıeginde Almaty qalasyndaǵy Perınatologıa jáne balalar kardıohırýrgıasy ortalyǵynda uryqtyń kútimi ortalyǵy quryldy. Prenataldy dıagnostıka erte aralasýdyń birinshi kezeńi bolyp tabylady. Ekinshi kezeńde qalalyq ákimdik pen «AYALA» qaıyrymdylyq qorynyń qoldaýymen Ortalyqta náreste men bala ólimi men múgedektik deńgeıin tómendetýge múmkindik beretin uryqta anyqtalǵan týa bitken aqaýdy qursaqishilik túzetý úshin uryq hırýrgıasyn engizý josparlanǵan. Sondaı-aq 3-kezeńde balada týǵannan keıingi aýytqýdy túzetý úshin neonataldy hırýrgıany uıymdastyrý jáne engizý josparlanǵan», - dep atap ótti.
Arnaıy shaqyrylǵan qonaqtardyń qatarynda Ózbekstan Respýblıkasynan Buhara memlekettik medısına ınstıtýtynyń akýsherlik jáne gınekologıa kafedrasynyń meńgerýshisi Ihtıarova Gúlchehra Aqmalqyzy men akýsher-gınekologtar boldy.
Akýsherlik jáne perınatologıa salasyndaǵy sarapshy, profesor A.V. Mıhaılov júktilik jáne bosaný kezindegi uryqtyń jaǵdaıyn baǵalaýdyń zamanaýı ádisterimen tanystyrdy, ananyń Rh-faktory boıynsha ızoımmýnızasıa saldarynan uryqtyń jáne jańa týǵan náresteniń gemolıtıkalyq aýrýy máselelerin talqylady, aýrýdy emdeýdiń zamanaýı ádisterine toqtaldy. Baıandamanyń úlken blogy kóp júktilikke, onyń asqynýyna, dıagnostıkalyq ádisterge jáne yqtımal túzetýlerge, sonyń ishinde uryqtyń hırýrgıasyna arnalǵan.
Sheberlik synybynyń tájirıbelik bóliminde dárigerler klınıkalyq mysaldy taldady. Egiz ben úshemge júkti áıelder zamanaýı saraptamalyq ÝDZ apparaty arqyly últradybystyq dıagnostıkalyq ádispen qaraldy. Akýsher-gınekologtar últradybystyq dárigerlermen birge osy naýqastardy emdeýdiń taktıkasy jáne aýrýhanaǵa jatqyzý merzimin talqylady. Odan keıin profesor perzenthanada bosanǵan áıeldi últradybystyq zertteýden ótkizip, dárigerlerdiń ujymdyq jumys prınsıpiniń mańyzdylyǵyna toqtady, bosanýdaǵy zamanaýı tásilder, jańa tehnologıalar, sonyń ishinde bosaný kezindegi últradybystyq navıgasıamen bólisti. Uryqtyń týa bitken jáne tuqym qýalaıtyn aýrýlarynyń prenataldyq dıagnostıkasy salasyndaǵy ǵylymı zertteýler de qamtyldy. Akýsher-gınekologtar akýsherıadaǵy tótenshe jaǵdaıda kómek kórsetý tájirıbesimen bólisti.
Sheberlik synybynyń taqyryby akýsherlik jáne perınatologıadaǵy kúrdeli máselelerge, sonyń ishinde tıimdi perınataldyq tehnologıalardy qoldaný arqyly zamanaýı dıagnostıka men emdeýge arnaldy.
Sheberlik synybyna qatysýshylar onyń joǵary uıymdastyrylǵanyn, aqparatty tamasha usynýdy, lektordyń jeke qasıetterin jáne aýdıtorıamen jaqsy qarym-qatynasyn atap ótti.
«Perınatologıa jáne balalar kardıohırýrgıasy ortalyǵynyń» ujymy Almaty qalasy ákimdigine, Qoǵamdyq densaýlyq saqtaý basqarmasyna, «AYALA» qaıyrymdylyq qoryna jáne jeke RF eńbek sińirgen dárigeri, profesor Mıhaılov Anton Valerevıchke baǵa jetpes bilimi úshin alǵys bildiredi.
Sapar barysynda profesor Mıhaılov Anton Valerevıch Almaty qalasy «Perınatologıa jáne balalar kardıohırýrgıasy ortalyǵynyń» jumysy men jabdyqtalýyn joǵary baǵalap, akýsher-gınekologtar men últradybystyq dıagnostıka mamandarynyń kásibı deńgeıiniń joǵary ekenin atap ótti.
Perınatologıa jáne balalar kardıohırýrgıasy ortalyǵynda turaqty túrde akýsherlik, perınatologıa, balalar kardıohırýrgıasy salasyndaǵy álemge áıgili mamandardyń qatysýymen túrli sheberlik sabaǵy men trenıńter ótkizilip turady. Joǵary bilikti mamandardyń qatysýymen ótetin mundaı is-sharalar qalanyń bosandyrý qyzmetin odan ári jaqsartýǵa septigin tıgizedi.