Bokstan Reseı quramasynyń múshesi Azalıa Amıneva 2023 jyly genderlik synaqtan óte almaǵan, alaıda bıyl Parıj Olımpıadasyna qatysýǵa múmkindik alǵan Iman Helıfpen qaıta jekpe-jek ótkizýge usynys tastady, dep habarlaıdy aqshamnews.kz.
Amıneva bul týraly óziniń áleýmettik jelisinde málimdedi.
«Sálem, Iman Helıf! Negizsiz haıptyń astyna qaldym dep oılamaısyń ba? 2023 jyly Úndistanda ótken kezdesý esińde shyǵar? Seni nokaýtqa jiberdim. Bul sátti taǵy da qaıtalap, jeńiske jetýge, sen jol kesken qyzdardyń kegin qaıtarýǵa daıynmyn. Men jaýap kútemin. Ýaqyt ketti», - deıdi reseılik bylǵary qolǵap sheberi.
21 jastaǵy boksshynyń aıtýynsha, ol 8 tamyzdan basqa kez kelgen kúni, kez kelgen jerde judyryqtasýǵa daıyn. Sebebi sol kúni Amıneva kásibı rıngtegi debúttik kezdesýine shyǵady.
Osyǵan deıin Amıneva aljırlik boksshynyń Olımpıadaǵa qatysýyn synap, HOK-tyń sheshimin alaıaqtyq dep tanyǵan edi. Degenmen, Helıftiń ákesi qyzyna qatysty taraǵan qaýesetterdi joqqa shyǵaryp, onyń transgender emes ekenin aıtqan bolatyn.
Iman Helıftiń ózi bolsa Olımpıada oıyndarynyń fınalyna shyqty. Ony ózge boksshy qyzdardyń kóbi «transgender» dep, ıaǵnı jynysyn aýystyrǵan erkek dep aıyptaýda. Bulaı aıtýyna Helıftiń túr-álpeti, dene-bitimi jáne er adamǵa tán joıqyn soqqylary sebep bolǵan. Ol az deseńiz, byltyr álem chempıonatynda aljırlik boksshy genderlik testten óte almaǵan.