Reseı Tramp ákimshiliginiń kómegimen óziniń qarjy sektoryn batys sanksıalarynan kezeń-kezeńimen qutqarýǵa daıyn. Keshe AQSH pen Reseı arasyndaǵy Qara teńizdegi atysty toqtatý jónindegi kelisim aıasynda reseılik bankterdiń SWIFT júıesine qosylý máselesi sheshildi, dep habarlaıdy aqshamnews.kz.
Kremldiń málimeti boıynsha, alǵashqy bolyp Rosselhozbank júıege qosylady
"Rosselhozbankten keıin Sber toby da SWIFT júıesine qosylatyn bolady. Qazir Sber barlyq sanksıalardy alyp tastaý boıynsha Kremlmen birlesip qadamdardy pysyqtap jatyr. Bir sózben aıtqanda, Reseı Tramppen jaqyndyǵyn paıdalanyp, Sber úshin tolyq jol ashýdy kózdep otyr", - dep habarlaıdy DALA INSIDE derekkózi.
Osy oraıda, Sber óziniń halyqaralyq naryqtaǵy joǵaltyp alǵan pozısıalaryn qaıta qalpyna keltirý úshin qadamdar jasaýda. Sanksıalardyń qysymymen Qazaqstanda satylǵan bankin qaıta satyp alý jospary qarastyrylýda. Qazirgi kezde onyń aty Bereke bolyp ózgergen Qazaqstandaǵy burynǵy enshiles banki Katardyń Lesha Bank tobynyń qolynda. Arabtar Bereke bankin baǵasyn kóterip, ózderine tıimdi sharttarmen qaıta satýǵa qarsy emes ekenderin bildirdi.
"Lesha Bereke-ni Qazaqstan Úkimetinen nomınaldy túrde 65 mıllıard teńgege satyp alǵan bolatyn. Endi ony keminde 200 mıllıard teńgege satady. Sberbankte ondaı aqsha bar. Reseılikter tek sanksıalardyń barlyǵynan shyǵýyn kútýde. Sondyqtan búgin be, erteń be, Sber Qazaqstan naryǵyna oralady", - deıdi derekkóz.
Bereke arabtar úshin tabysty bolýda. 2024 jyly bank keminde 15 mıllıard teńge taza kiris alǵan. Alaıda, Lesha Qazaqstandaǵy bankti uzaq ýaqyt ustaýǵa nıetti emes. Jahandyq ınvestısıalyq saıasat sheńberinde paıdasyn barynsha alý jáne bankti qymbatqa satý jospary bar.
Al Sber úshin Qazaqstanǵa oralý tek bıznes emes, sonymen qatar geosaıasattyń mańyzdy bóligi bolyp tur. Osylaısha, eki taraptyń múddeleri bir-birimen ushtasýda.