QR Premer-Mınıstriniń orynbasary Tamara Dúısenovanyń tóraǵalyǵymen joǵary oqý orynynyń basqarma tóraǵasy – rektory qyzmetine úmitkerlerdi aıqyndaý jónindegi respýblıkalyq komısıanyń otyrysy ótti. Atalǵan komısıanyń quramynda QR Parlamenti Májilisiniń depýtattary, Ǵylym jáne joǵary bilim mınıstrliginiń, JOO-lar qaýymdastyǵynyń, «Atameken» ulttyq kásipkerler palatasynyń ókilderi jáne qoǵam qaıratkerleri bar.
Eń aldymen, jıynǵa qatysýshylarǵa rektorlardy joǵary jáne joǵary oqý ornynan keıingi bilim berý salasyndaǵy qyzmetti júzege asyratyn uıymdardyń basqarma tóraǵasy – rektoryn aıqyndaý jónindegi tártiptiń jańa jobasy tanystyryldy. Oǵan sáıkes úmitkerlerge qoıylatyn talaptar kúsheıtiledi. Eń basty maqsat – tıimdi menedjment arqyly joǵary bilim sapasyn kóterýge yqpal etý.
Jobaǵa sáıkes rektorlyqqa úmitkerdiń ǵylymı dárejesi bolýy kerek. Kandıdattyń ǵylymı ataǵy (profesor, dosent) da eskeriledi. Sondaı-aq bilim jáne ǵylym salasynda kem degende 5 jyl basqarý tájirıbesi bolýy mindet. Úmitkerden qazaq jáne orys tilderinde erkin sóıleı alý talap etiledi. Qosymsha aǵylshyn tilin meńgergeni de quptalady. Bul tek rektorǵa qoıylatyn talaptardyń bir bóligi ǵana.
Kezekti otyrys barysynda birneshe joǵary oqý ornynyń basshylyǵyna úmitkerler tyńdaldy.
Qaraǵandydaǵy Á. Saǵynov atyndaǵy tehnıkalyq ýnıversıtetine Sáýle Saǵyntaevanyń kandıdatýrasy biraýyzdan maquldanyp, taǵaıyndaý týraly usynys berildi. Al ekinshi úmitker Ǵylym jáne joǵary bilim mınıstrliginiń kadrlyq rezervine engizildi. Atalǵan JOO taý-ken isi, geologıa, geodezıa jáne kartografıa, mashına jasaý, energetıka, kólik, sáýlet jáne qurylys, t.b. baǵyttar boıynsha mamandardy daıarlaıdy.
İ. Jansúgirov atyndaǵy Jetisý ýnıversıteti – óńirdegi pedagogıkalyq kadrlardy ázirleıtin negizgi ortalyqtardyń biri. Onyń rektory qyzmetine 3 úmitker qarastyryldy. Nátıjesinde komısıa músheleriniń kópshilik daýsymen Ermek Búribaevtyń kandıdatýrasy usynyldy.
Rýdnyı ındýstrıaldy ýnıversıteti eldiń jáne óńirdiń eńbek naryǵyna negizinen tehnıkalyq ǵylymdar men tehnologıalar boıynsha mamandardy daıyndaıdy. Respýblıkalyq komısıa rektorlyqqa 3 úmitkerdi qarastyrdy. Oqý ornyn damytýǵa baǵyttalǵan baǵdarlamalardyń barlyǵy joǵary baǵalandy. Nátıjesinde komısıa músheleri JOO rektoryn saılaýdy qosymsha qarastyrý týraly sheshim qabyldap, sharany keıinge shegerýdi uıǵardy.