Astana medısına ýnıversıtetiniń eks-prorektory jemqor bolǵany úshin sottaldy. Bul týraly Sybaılas jemqorlyqqa qarsy is-qımyl agenttiginiń baspasóz qyzmeti málimdedi, dep habarlaıdy Almaty-akshamy.kz.
Nur-Sultan qalasy Baıqońyr aýdanynyń №2 soty úkimimen «Astana medısına ýnıversıteti» KEAQ prorektory M.Dáýletárova qaýipsizdigi ortasha túzeý mekemesinde merzimin óteýmen 3 jylǵa bas bostandyǵynan aıyryldy.
Ol jeke kompanıalardyń basshysy E.Grısenkodan elektrondy kitaptardy jetkizýdegi jalpy qamqorlyǵy úshin 10 000 AQSH dollary somasynda para alǵany úshin, sondaı-aq deldal M.Qaparov arqyly rektor laýazymyna taǵaıyndaý úshin 47 000 AQSH dollary somasynda para berýge áreket jasaǵany úshin kináli dep tanyldy.
"Sot Grısenkony 3 jylǵa, deldal Qaparovty 7 jylǵa bas bostandyǵynan aıyrýǵa úkim shyǵardy", – delingen resmı habarlamada.