Qazaq kınematografıasy orny tolmas qazaǵa ushyrady.
Qazaqstannyń tanymal rejıseri, eńbek sińirgen qaıratkeri Satybaldy Narymbetov 75 jasynda ómirden ótti, dep habarlady Almaty-akshamy.kz.
«Búgin qazaq kınematografıasy orny tolmas qazaǵa ushyrady. Kıno men ádebıette ózindik sýretkerlik álemin qalyptastyrǵan, qazaq kınosyna tamasha týyndylar tartý etken Satybaldy aǵamyz kelmestiń kemesine minip, aramyzdan kete bardy.
Qazaqstan Respýblıkasy Mádenıet jáne sport mınıstrliginiń atynan kınorejısór, jazýshy, «Qurmet» ordeniniń, «Platınaly Tarlan» syılyǵynyń ıegeri, Fransıa kıno akademıasynyń Jorj Sadýl atyndaǵy táýelsiz syılyǵynyń laýreaty, Qazaqstannyń eńbek sińirgen qaıratkeri Satybaldy Jáleluly Narymbetovtiń qaıtys bolýyna baılanysty otbasy men jaqyndarynyń qaıǵysyna ortaqtasyp, kóńil aıtamyn. Ár fılmi men shyǵarmasy arqyly sol zamannyń tynys-tirshiligin, aýanyn jetkizýge tyrysatyn metrdiń asyl beınesi qalyń qazaqtyń kóńil tóri men júrek túkpirinde máńgi saqtalady. Marqumnyń kózi tirisinde jasaǵan ıgi-jaqsy amaldary aldynan jarylqasyn. Jatqan jeri jaıly, topyraǵy torqa bolsyn»,– dep jazdy Mádenıet jáne sport mınıstri Aqtoty Raıymqulova Facebook -tegi paraqshasynda.