Qazir elimiz túbegeıli saıası-áleýmettik reformalardy júzege asyrý ústinde. Ári bul reformalar naqty maqsattardy kózdep otyr.
Búgin ótken Úkimettiń keńeıtilgen otyrysynan biz jalǵasyp jatqan reformalardyń eń bir kúrdeli ári sheshýshi kezeńine aıaq basqanymyzdy kóremiz. Iaǵnı, Prezıdent Qasym-Jomart Toqaevtyń memlekettik qurylymdaǵy «Kúshti Prezıdent – yqpaldy Parlament – esep beretin Úkimet» formýlasy, qoǵamda ornyqtyrýǵa baǵyttalǵan «Zań men tártip» qaǵıdaty, basqarýshy bıliktiń «Estıtin úkimet» qaǵıdaty jáne osynyń bári ushtasa otyryp, «Ádiletti Qazaqstan» qurý syndy bastamasy óziniń jańa kezeńine qadam baspaq. Ári bul reformalardyń eń bir sheshýshi kezeńi bolǵaly tur. Sebebi, endigi aýyr mindetti júkteıtin Úkimet pen Ulttyq bank eldiń damýyna tikeleı áser etetin batyl qadam jasaýyna týra keledi.
Úkimettiń keńeıtilgen otyrysynda Memleket basshysy úkimet jetekshileriniń batyl da kúrdeli sheshimderdi qabyldaýǵa daıyn bolýyn taǵy da qaıtalap aıtty. Prezıdenttiń bul máseleni shegeleı aıtýynda ózindik úlken mán jatyr. Osyǵan deıin jasalǵan áleýmettik-saıası jáne quqyqtyq reformalar endigi jerde úkimettiń tıimdi áreketimen, naqty da nátıjeli jumysymen jalǵasymyn tabýy tıis. Ol úshin osyǵan deıingi keıbir naqty sektorlardyń damýyna kedergiler birjolata joıylyp, ınvestısıa tartý men óńirlik damýǵa, halyqtyń ál-aýqatyn jaqsartýǵa naqty qadam jasaýǵa týra keledi. Bul kúrdeli de batyl sheshimderdi qabyldaýmen júzege asady.
Memleket basshysy sózinde Úkimettiń basty jaýapkershiligin kórsete otyryp: «Úkimet el ekonomıkasyn turalap qalýdan saqtap, ornyqty damýdy qamtamasyz etý úshin kúrdeli sheshimder qabyldaýy kerek jáne eń bastysy, sol sheshimderdi iske asyrýǵa tıis», – dep atap kórsetti. Oǵan qosa memlekettik qyzmetshilerdiń biliktiligi men jaýapkershilikti ala bilýi de mańyzdy ekenine toqtaldy.
Sheshýshi kezeńdegi úkimettiń jaýapkershiligi aýyr ekenin qoǵam da anyq túsinip otyr. Sebebi, qazirgi jahandyq ekonomıkalyq belsendilik deńgeıi jáne qubylmaly geosaıası jaǵdaılardyń da syrtqy yqpalyn joqqa shyǵara almaımyz. Aıtalyq, iri ekonomıkalar arasyndaǵy tarıftik tartys pen saýda soǵysy, sanksıamen jaýaptasýlar álemdik naryqqa óz yqpalyn jasamaı qalmaıdy. Energıa shıkizaty ekonomıkamyzdan basym oryndy ıelenetindikten, energıa baǵasyndaǵy qubylmalylyq ta bizdiń naqty mejelerden jańyldyrýy ǵajap emes.
Mine, osyndaı kúrdeli kezeńde elimiz úshin básekege qabilettilikti qorǵaý jáne ınvestısıalyq tartymdylyqty joǵary deńgeıde ustap turý asa mańyzdy. Sondyqtan Prezıdent tarapynan úkimetke basy artyq búrokratıadan arylyp, jedel jumys isteýge qabiletti bolý, ári únemshildikpen jumys isteý mindeti júktelip otyr.