Qazaqstan Elshisi Tımýr Pirimbetov Latvıa Respýblıkasy Ortalyq saılaý komısıasynyń (OSK) Tóraıymy Krıstına Berzınámen kezdesti, dep habarlaıdy Almaty-akshamy.kz Almaty.tv-ge silteme jasap.
Pirimbetov 2022 jylǵy 5 maýsymda elimizde ótetin Qazaqstan Respýblıkasynyń Konstıtýsıasyna ózgerister men tolyqtyrýlar engizý týraly jalpyulttyq referendýmǵa daıyndyq barysy týraly aıtyp berdi.
Elshi konstıtýsıalyq reforma júıeli sıpatqa ıe ekenin jáne Prezıdent Qasym-Jomart Toqaev bastamashylyq etken «Jańa Qazaqstandy» qurý jónindegi aýqymdy saıası reformalardy iske asyrýǵa baǵyttalǵanyn atap ótti.
Referendýmǵa qoıylatyn máseleler bılik tarmaqtary arasyndaǵy ózara qarym-qatynastardyń ońtaıly teńgerimin qalyptastyrý jáne memleket pen qoǵam arasynda tıimdi dıalog qurý maqsatynda qoldanystaǵy saıası modeldiń tujyrymdamalyq transformasıasyna qatysty.
K. Berzıná Qazaqstan OSK Tóraǵasynyń shaqyrýymen latvıalyq tarap elimizge referendýmnyń halyqaralyq baqylaýshylary retinde eki ókildi jiberetinin habarlady. Latvıa OSK basshysy bıylǵy qazanda ótetin Latvıadaǵy parlamenttik saılaýǵa daıyndyq barysy týraly da aıtty.
Kezdesý sońynda taraptar eki eldiń saılaý komısıalary arasyndaǵy syndarly yntymaqtastyqty jalǵastyrýǵa múddeli ekenderin rastady.