Referendýmda 11 myńnan astam qazaqstandyq shet memleketterde daýys beredi.
Bul týraly QR Syrtqy ister mınıstrliginiń erekshe tapsyrmalar jónindegi Elshisi Jalǵas Ádilbaev aıtty, dep habarlaıdy Almaty-akshamy.kz Egemen.kz-ke silteme jasap.
«QR Syrtqy ister mınıstrligi 52 shet memlekette 65 ýchaskelik referendým komısıasyn qurdy. Atalǵan komısıalardyń barlyq 325 múshesi qashyqtan oqytýdan ótip, Respýblıkalyq referendýmnyń quqyqtyq negizderi men referendým komısıalarynyń jumysyn uıymdastyrý baǵdarlamasy boıynsha arnaýly testileýden ótti. Qazirgi ýaqytta shetelden usynylǵan belsendi daýys berý quqyqtary bar shet elderde júrgen Qazaqstan azamattarynyń aldyn ala tiziminiń negizinde saılaýshylarymyzdyń sany shamamen 11 350 adamdy quraıdy», - dedi ol Ortalyq saılaý komısıasynyń otyrysynda.
Onyń atap ótýinshe, mınıstrlik sheteldegi barlyq ýchaskelermen baılanys ornatqan. Daýys berý búletenderi jetkizilip jatyr.
«Gonkong, Shanhaıdaǵy jaǵdaıǵa baılanysty búletenderdi DHL kýrerlik qyzmeti arqyly jetkizdik. Túrikmenstanǵa demalystan oralatyn Túrikmenbashy qalasyndaǵy konsýl arqyly jetkizildi. Qalǵan 61 ýchaskege bizdiń qyzmetkerlerimiz dıplomatıalyq kýrermen issaparǵa baryp, jetkizdi. Qazirgi ýaqytta 55 ýchaskemiz qajetti materıaldardy aldy. Qalǵan ýchaskelerge búleten búgin tolyq jetkiziledi dep otyrmyz», - dedi Jalǵas Ádilbaev.