Kúni keshe ǵana mektep tabaldyryǵyn attaǵan búldirshinder alǵashqy oqýlyǵy – Álippemen qoshtasýda. Alǵashqy ustazy ustatqan oqýlyqqa qımastyq seziledi. Dese de 4 aı kóleminde árip tanyp, qalam ustap úırengen baldyrǵandarǵa ol endi tek máńgilik dos bolyp qalady da, óz ornyn «Ana tili» oqýlyǵyna beredi. Sóıtip, búldirshinderdiń bilim eline bastaǵan kerýeni alǵa qaraı jyljı beredi.
Almatynyń Áýezov aýdanyna qarasty №202 mektep-gımnazıasynyń 1 «á» synyp oqýshylary kúni keshe ǵana «Álippe» oqýlyǵymen qoshtasty. Synyp jetekshisi Ardaq Aıdarqyzynyń sheber uıymdastyrýymen ótken keshke mektep basshylyǵy, muǵalimder, ata-analar qatysty. Táýelsizdik týraly patrıottyq ánderimen kórermen qaýymdy erekshe sezimge bólegen 31 bala, endi bir mezette balalyq jaqqa jetelep, án aıtyp, bı bıledi. Uldar jaǵy synyptaǵy 21 qyzǵa arnap án aıtsa, taǵy bir top oqýshy kidirmesten túrli taqpaqtar aıtyp, tánti etti. «Qara jorǵa», «Bıpyl», «Qarlyǵash» bılerin tamashalaǵan kórermen balalardyń ónerine joǵary baǵa berdi.
Áserli keshti oqýshylardyń ózderi kezektesip júrgizip otyrdy. Synyp jetekshisi Ardaq Aıdarqyzynyń sózine súıensek, mundaı format balalarǵa jaýapkershilikti, ózine degen senimdilikti, sahna mádenıetin úıretedi, aýdıtorıamen jumys jasaýǵa baýlıdy.
Kesh sońynda sóz alǵan mektep dırektory Bolat Janaıhan balalarǵa aq jol tilep, Alǵys hattar tabystady.