Qazaqstan Respýblıkasy Memlekettik rámizderiniń 30 jyldyǵyn merekeleý aıasynda Nur-Sultan qalasynda patrıottar forýmy ótti. İs-sharaǵa kórnekti mádenıet ókilderi, qoǵam jáne memleket qaıratkerleri, ǵalymdar jáne t.b. qatysty dep habarlaıdy Almaty-akshamy.kz Egemen.kz-ke silteme jasap.
Qazaqstan Respýblıkasy Memlekettik rámizderiniń 30 jyldyǵyn merekeleý aıasynda Nur-Sultan qalasynda patrıottar forýmy ótti. İs-sharaǵa kórnekti mádenıet ókilderi, qoǵam jáne memleket qaıratkerleri, ǵalymdar jáne t.b. qatysty.
«Biz árqashan Týymyz ben Ánuranymyzdy, Eltańbamyzdy maqtan tutamyz jáne búgin osy tamasha merekeni atap ótý úshin jınalyp otyrmyz. Árqashanda aspan tústes-kók baıraǵymyz táýelsizdigimizdiń myzǵymastyǵyn, qazaqstandyqtardyń joǵary jetistikterin álemge maqtanyshpen súıinshilep, kókte jelbirep tursyn!
Árqaısymyzdyń júregimizde jattalǵan Ánuranymyzdyń qasıetti sózderi álemdi jańartatyn jetistikterge jetelep, jigerlendirsin. Eltańbamyz árqashanda Qazaq memleketiniń joǵary bedeliniń belgisi bolsyn! Bul zalda elimizdiń ozyq oıly, jasampaz jastary jınalyp otyrsyzdar, men Sizderdiń memlekettik rámizderge degen aıryqsha qasterli qarym – qatynastaryńyzdyń negizinde elge degen zor maqtanysh, Otanǵa degen sheksiz súıispenshilik jáne shynaıy halyq birligi turǵanyna kámil senimdimin», dedi Dáýren Abaev forýmǵa qatysýshylarǵa arnaǵan sózinde.
Sondaı-aq, is-shara barysynda «Jyl patrıoty» nomınasıasynyń jeńimpazdary marapattaldy:
«Ǵylym jáne bilim» – Asqat Jumabekov, bilim berý zertteýleriniń Eýropalyq Asosıasıasynyń eýropalyq baıqaýynyń jeńimpazy; Maksım Zdoroves, fızık, L. N. Gýmılev atyndaǵy Eýrazıa ulttyq ýnıversıteti trektik membranalyq tehnologıalardy damytý jónindegi ınjenerlik beıindegi zerthananyń jetekshisi, fızıka-matematıka ǵylymdarynyń kandıdaty.
«Mádenıet jáne sport» – 2022 jylǵy Beıjińdegi qysqy Paralımpıadasynyń qola júldegeri Aleksandr Gerlıs; Gúlnur Mamasarıpova, teleprodúser, senarıst.
«Medısına jáne volonterlik» – QazCovid-in (QazVac) koronavırýs ınfeksıasyna qarsy qazaqstandyq vaksınany ázirleýshi Kúnsulý Zakarıa; erikti Abylaıhan Ábdirash Nur-Sultan qalasynda pandemıa kezinde kásibı medısınalyq kómek kórsetken. Sondaı-aq halyqqa medısınalyq kómek kórsetý úshin «Qazaqstannyń Medısına Jastary» RQB qurǵan.
«Ónerkásip jáne aýyl sharýashylyǵy» - kásipker Beıbit Asanov óz qarajatyna týǵan aýylynda (Pogadaev aýyly, BQO) sport keshenin salǵan. Qazirgi ýaqytta onda aýyl turǵyndary jattyǵyp, mádenı is-sharalar ótkizýde; Amanjol Arıpov, «BAHA SOHNE» JSHS dırektory, Aqmola oblysy Atbasar aýdany Pokrovka aýylynda suly úlpegin óndiretin zaýyt salǵan. Kompanıanyń 1000 bas iri qara malǵa arnalǵan bordaqylaý alańy bar.
«Tehnologıa jáne bıznes» - Órken Mamyrbaev Phillips kompanıasymen birge qazaq tilindegi sózderdi mátinge aınaldyratyn baǵdarlamalyq qamtamasyz etýdi ázirlegen. Bul tehnologıa qazaq tilin aqparattyq keńistikke ıntegrasıalaý jáne damytý úshin tuńǵysh ret ázirlendi; Sabyrjan Akbarov, kásipker jáne mesenat, 2021 jyly Sardoba sý qoımasy bógetiniń buzylýynan paıda bolǵan apat kezinde Túrkistan oblysy Maqtaaral aýdanynyń turǵyndaryna kómek kórsetken. Sondaı-aq ótken jyly qýańshylyqqa baılanysty jem-shóp tapshylyǵy kezeńinde Mańǵystaý oblysynyń turǵyndary úshin shóp jınaýǵa kómek kórsetken.
«Erekshe erlik kórsetken azamattar» – Ulan Myrzabaı, gvardıashy, Aqtóbe qalasyndaǵy qańtar oqıǵasy kezinde Otan aldyndaǵy boryshyn abyroımen oryndap, erlik kórsetken; Sábıt Shontaqbaev segizinshi qabattan úsh jasar qyzdy óz ómirin qaterge tigip qutqarǵan.