Almatyda naýryz aıynan bastap qyzylshanyń 1097 zerthanalyq rastalǵan jaǵdaıy tirkeldi
Almaty qalasynyń sanıtarıalyq-epıdemıologıalyq baqylaý departamenti málim etkendeı, megapolıste qyzylshamen syrqattanýshylyq boıynsha turaqsyz epıdemıologıalyq jaǵdaı baıqalady.
«Osy jyldyń naýryz aıynan bastap qyzylshanyń 1097 zerthanalyq rastalǵan jaǵdaıy tirkeldi, onyń ishinde 14 jasqa deıingi balalar arasynda 966 jaǵdaı (88,05%). Byltyr qalada qyzylsha men qyzamyqtyń zerthanalyq rastalǵan jaǵdaılary tirkelmegen», - dep atap ótti departamenten.
Qyzmet mamandary medısınalyq uıymdarmen birlesip barlyq oshaqta epıdemıaǵa qarsy is-sharalar júrgizdi. Nátıjıesinde naýqaspen baılanysqa túsken barlyǵy 14 893 adam anyqtalyp, epıdemıologıalyq kórsetkish boıynsha qyzylshaǵa qarsy shuǵyl ımmýndaýǵa jatatyn 277 adam egildi. Barlyq baılanysqa túskender medısınalyq baqylaýǵa alynyp, qyzylshanyń aldyn alý sharalary týraly túsindirý jumystary júrgizildi.
Almaty qalasynyń sanıtarıalyq-epıdemıologıalyq baqylaý departamenti qyzylshany juqtyrýdan, sondaı-aq olardyń asqynýynan aldyn alatyn jalǵyz tıimdi qural tek vaksınasıa ekenin eske salady. Qyzylshaǵa qarsy vaksınasıa 1 jasta jáne 6 jasta 2 ret jasalady. Bul vaksınasıalanǵan adamdarda ómir boıy bolatyn vaksınasıadan keıingi ımýnıtetti damytýǵa múmkindik beredi. Qyzylshaǵa qarsy vaksınanyń árbir alynǵan dozasy balanyń ımýnıtetin kúsheıtedi.
Ekpelerdi júrgizý úshin DDU sertıfıkattaǵan jáne Qazaqstan Respýblıkasynda tirkelgen qyzylshaǵa, qyzamyqqa, epıdemıalyq parotıtke qarsy aralas vaksına qoldanylady. Vaksınasıa turǵylyqty jeri boıynsha qalanyń emhanalarynyń barlyq egý kabınetterinde tegin júrgiziledi. Máselen, osy jyldyń 8 maýsymynda Almaty qalasy Qoǵamdyq densaýlyq saqtaý basqarmasynyń vaksına qoımasyna DDU sertıfıkattaǵan jáne elde tirkelgen 37200 doza qyzylshaǵa, qyzamyqqa, epıdemıalyq parotıtke (QKP) qarsy biriktirilgen vaksına keldi.
Aıta keteıik, qyzylsha – aýa tamshyly ınfeksıalar tobyna jatatyn jedel juqpaly vırýstyq aýrý. Aýrý adamnan adamǵa aýa arqyly, tynys alý joldarynyń tamshylarymen nemese aýrý juqtyrǵan adamnyń murny nemese tamaq bólinisinen juǵady.
Qyzylsha – eń juqpaly ınfeksıanyń biri, sebebi aýyratyn adammen baılanysqa túsken soń ekpe almaǵan adamdardyń 90%-dan astamy aýyrady. Qaladaǵy turaqsyz epıdemıologıalyq jaǵdaıǵa baılanysty ońtústik megapolıstiń epıdemıologtary aýrýdyń belgileri paıda bolǵan kezde kelesi erejelerdi qatań túrde usynady:
- ózin-ózi emdeýmen aınalyspaý, dárigerdi úıge shaqyryp jáne dárigerdiń nusqaýyboıynsha em alý;
- úıde bolý, jumys oryndaryna, sondaı-aq qoǵamdyq oryndarǵa barmaý. Ásirese, ambýlatorıalyq emdelip jatqan naýqastar úıde oqshaýlaýdy qatań saqtaýy kerek;
- aýyryp jatqan balalardy jazǵy saýyqtyrý lagerlerine, uıymdasqan ujymdarǵa jibermeý.