Qyzylsha – aýrý adamnan saý adamǵa aýa tamshylary arqyly beriletin óte juqpaly jiti vırýstyq aýrý.
12-15 aılyq jáne 6 jas aralyǵyndaǵy balalarǵa profılaktıkalyq egýlerdiń ulttyq kúntizbesine sáıkes qyzylshaǵa qarsy josparly egýler júrgiziledi, dep habarlaıdy Almaty-akshamy.kz
Qazaqstan Respýblıkasy Prezıdenti İs basqarmasynyń Medısınalyq ortalyǵy (budan ári – Medısınalyq ortalyq) Qazaqstan Respýblıkasynda qyzylshamen syrqattanýshylyqtyń ósýine baılanysty kelesini habarlaıdy.
Imýnıteti joq adamdardyń qyzylshamen syrqattanǵan adammen baılanysta bolǵannan keıin aýrýǵa shaldyǵý múmkindigi 100%-ǵa jýyq.
Aýrý bastapqyda kádimgi jedel respıratorlyq vırýstyq ınfeksıaǵa nemese tumaýǵa uqsaıdy. Ádette, dene qyzýynyń kóterilýi, bas aýrýy, bulshyqet syrqyrap aýyrýy, tamaq aýrýy, murynnyń bitelýinen bastalyp, jótel jáne konúnktıvıt tez órshıdi. Qyzylshanyń basqa ınfeksıalardan aıyrmashylyǵy, ádette aýrýdyń bastalýynan úshinshi kúni naýqastarda daqty-papýlárlyq elementter dep atalatyn dıametri birneshe mıllımetrlik aıqyn qyzyl tústi daqtar men bórtpelerdiń paıda bolýy tán. Bastapqyda bórtpe adamnyń betinde paıda bolady, sodan keıin deneniń barlyq bólikterine jaıylyp tómen túsedi. Qyzylshanyń asqynýlaryna: soqyrlyq, ensefalıt, menıngıt, menıngoensefalıt, polınevrıt, pnevmonıa, otıt jáne basqa aýrýlar jatady.
Halyqty qyzylshadan qorǵaýdyń birden-bir ádisi – josparly jáne shuǵyl vaksınalaý. Vaksınalanǵan adamdar is júzinde qyzylshamen aýyrmaıdy. 12-15 aılyq jáne 6 jas aralyǵyndaǵy balalarǵa profılaktıkalyq egýlerdiń ulttyq kúntizbesine sáıkes qyzylshaǵa qarsy josparly egýler júrgiziledi. Shuǵyl profılaktıka qyzylshamen syrqattanǵan naýqaspen baılanysta bolǵannan keıin 72 saǵattan keshiktirmeı júrgiziledi.
Medısınalyq ortalyq ınfeksıanyń taralýyn boldyrmaý maqsatynda kelesini usynady:
- adam kóp jınalatyn oryndarǵa barýdy shekteý;
- úı-jaılardy jıi jeldetý;
- jiti respıratorlyq vırýstyq ınfeksıalar jáne bórtpelerdiń belgileri bar qyzmetkerlerdi jumystan shektetý;
- qyzmetkerlerdiń densaýlyǵy nasharlaǵan jaǵdaıda jumysqa barýdan bas tartyp, dıagnoz qoıý úshin dárigerge qaralý.
Eger dáriger qyzylshaǵa kúdiktense, dereý shara qoldaný úshin basshylyqqa habarlaý qajet.
Qyzmetker qyzylshamen aýyrǵan adammen baılanysta bolǵan jaǵdaıda, naýqas oqshaýlanǵan kezden bastap 21 kún ishinde aýrý belgileri bar adamdardy belsendi túrde anyqtaý jáne oqshaýlaý maqsatynda medısınalyq qyzmetkerlerdiń kúndelikti tekserip-qaraý arqyly medısınalyq qadaǵalaýy belgilenedi.