Almaty qalalyq qoǵamdyq densaýlyq saqtaý basqarmasynyń málimetinshe, búgingi kúni 136 naýqas stasıonarlyq em alyp jatyr, onyń 108-i qalalyq balalar klınıkalyq juqpaly aýrýlar aýrýhanasynda jatyr.
«Naýqastar arasynda qyzylshadan qaıtys bolǵandar tirkelgen joq. Stasıonarlyq em qabyldap jatqan naýqastardyń jaǵdaıy ortasha aýyr», - delinedi vedomstvonyń habarlamasynda.
№36 qalalyq emhananyń ınfeksıonıst dárigeri Bópesh Ámirhanova qyzylshanyń óte juqpaly jiti vırýstyq ınfeksıa ekenin jáne aýrýdy birden anyqtaýǵa bolmaıtynyn aıtty.
"Sondyqtan eger saý adam qyzylshamen aýyrǵan adammen baılanysta bolsa, onda buǵan erekshe mán berý kerek. Ádette qyzylsha aýa tamshylary arqyly juǵady. Bul rette patologıanyń ózi ǵana emes, ınfeksıanyń saldary da qaýipti. Aýrý kataraldy belgilerden bastalady. Iaǵnı, joǵary temperatýra, jalpy ıntoksıkasıa belgileri, jutqynshaqtyń, konúnktıva men tynys alý músheleriniń shyryshty qabyǵynyń qabynyp zaqymdalýy bolady", - dedi ol.
Dárigerdiń sózinshe, aýrýdyń negizgi taralý kózi – aýrý adam bolyp tabylady. Sondaı-aq qyzylshamen kóbinese 5 jasqa deıingi balalar aýyrady. Aýrýdyń alǵashqy belgileri JRVI belgilerine óte uqsas. Qyzylsha bórtpesi aýrý bastalǵan soń 3-4 kúnnen keıin paıda bolady.
"Daqtar ádette bet pen moıynda shyǵa bastaıdy, keıin denege, aıaq-qolǵa taralady. Bul qyzylsha aýrýyna tán belgilerdiń kezeńi. Ekpe almaǵan jáne qyzylshamen aýyrmaǵan adamdardyń 90%-y qyzylshamen aýyratyn adammen baılanysqa tússe, aýrýdy juqtyrady. Eger adam qyzylshany juqtyrǵanyna kúdigi bolsa ári aýrý adammen baılanysta bolǵanyn naqty bilse, eń aldymen juqpaly aýrý dárigerine kóriný kerek. Ózin-ózi emdeýge qatań tyıym salynady. Tek dáriger ǵana durys terapıany taǵaıyndaı alady», - deıdi Bópesh Ámirhanova.
Qyzylsha aýyr asqynýdy týdyrýy múmkin ekenin eskerý kerek, sondyqtan dereý dárigerge qaralǵan durys. Keı jaǵdaıda asqynýdy emdeý úshin aýrýhanaǵa jatqyzý qajet bolýy múmkin.
Qyzylshanyń aldyn alýdyń eń jaqsy joly - ekpe alý. Balalar qyzylshaǵa, qyzamyqqa jáne epıdemıalyq parotıtke qarsy vaksınanyń eki dozasyn alýy kerek, birinshi dozany 12-15 aıda, ekinshi dozany 6 jasta alady.
«Statısıkaǵa súıensek, bul aýrýǵa balalar kóbirek beıim bolady. Sondyqtan ekpe sizdiń balańyzdyń qyzylshamen aýyrýy nemese aýyrmaýynda úlken ról atqarady. Balańyzdyń ekpe alǵanyna senimdi bolmasańyz, dárigerge habarlasyp, balanyń medısınalyq qujattaryn tekserip, dárigermen ekpe alý múmkindigi týraly sóılesińiz", - dedi Bópesh Ámirhanova.