Elordada qyzylsha ınfeksıasyn juqtyrǵan 4 bala reanımasıa bóliminde jatyr. Bul týraly qalalyq №3 kópbeıindi balalar aýrýhanasy dırektorynyń orynbasary Roza Ótegenova málim etti, dep habarlaıdy almaty-akshamy.kz.
«Qańtar aıynyń basynan búginge deıin 100-ge jýyq bala qyzylshadan emdelip shyqty. Qazir reanımasıa bóliminde 4 bala jatyr. Olar qyzylsha juqtyrǵanǵa deıin esepte turatyn, dıagnozy bar balalar. Onyń ústine ekpe almaǵandyqtan qıynǵa soǵyp jatyr», - dedi Roza Ótegenova Astana qalalyq komýnıkasıalar qyzmeti alańynda ótken baspasóz máslıhatynda.
Mamannyń málimdeýinshe, kóptegen faktor halyqtyń qyzylshaǵa qarsy ımýnıtetiniń álsizdiginen.
«Elordada ótken jylǵy 6 qarashadan bastap búginge deıin 36,5%, ıaǵnı 44 800 bala ekpe aldy. Sonymen qatar revaksınasıa júrgizip, balalarǵa ýaqtyly ekpe salý qajet», - deıdi ol.