Kúdikti qamaýǵa alyndy.
Qyzylorda oblysynda ınternet arqyly jalǵan jarnama jasap, joq kólikterdi satqan 27 jastaǵy azamatsha qolǵa tústi, dep habarlaıdy Almaty-akshamy.kz oblystyq PD baspasóz qyzmetine silteme jasap.
Qyzylorda oblysy aýmaǵynda «Hi-tech» jedel profılaktıkalyq is-sharasy ótti. Joǵary tehnologıalar salasyndaǵy qylmystardy ashýdyń aldyn alýǵa baǵyttalǵan shara barysynda polıseıler alaıaqtyq jasaǵan qala turǵynyn ustady.
«Buryn da sotty bolǵan 27 jastaǵy azamatsha ınternet jelisindegi avtokólik satatyn jarnama saıtyna jalǵan habarlandyrý jarıalaǵan. Kólikti satyp alýǵa qyzyǵýshylyq tanytqan turǵyndardan jarnamany alyp tastaý úshin aldyn ala qarajat jiberýin suraǵan. Osylaısha ońaı oljany kózdegen áıel joq kólikterdi satqan. Qazir kúdikti azamatshanyń basqa da qylmystarǵa qatystylyǵy tekserilýde», - dep málimdedi Qyzylorda oblystyq polısıa departamenti.
Vedomstvo málimetinshe, atalǵan derek boıynsha QR Qylmystyq kodeksiniń 190-babynyń 2-bóligimen (Alaıaqtyq) sotqa deıingi tergep-tekserý áreketteri júrgizilýde. Kúdikti azamatsha qamaýǵa alynǵan.