Bul týraly Qyzylorda oblystyq tabıǵı resýrstar basqarmasy habarlady.
Qyzylorda oblysynyń tabıǵı resýrstar jáne tabıǵat paıdalanýdy retteý basqarmasyna qarasty «Qyzylorda oblystyq janýarlar dúnıesin memlekettik qorǵaý jónindegi mamandandyrylǵan mekemesiniń» mamandary «Ohotzooprom ÓB» RMKQ qyzmetkerlerimen birlesip reıd júrgizdi, dep habarlaıdy Almaty-akshamy.kz
Kezekti is-shara barysynda tabıǵat saqshylary Jalaǵash aýdanyna qarasty Jyryq atty skvajınasy mańynda «Taıota land krýzer – 100» avtokóligi kúdik týdyryp, qyraǵy mamandar kózine ilikken. Alaıda izin sýytpaq bolǵan belgisiz tulǵanyń Jalaǵash aýdanyna qarasty Qyzylshyn dep atalatyn jerde kóligi órtengendigi baıqaldy. Sol jerden barlyǵy 17 bas aqbóken janýarynyń óli denesi jáne 54 dana múıizi tabylyp aıǵaq zat retinde alynǵan.
Birlesken is-qımyldardyń nátıjesinde Jalaǵash aýdandyq polısıa bólimimen birlesip, sol mańdy qaraý barysynda Shaqshaq dep atalatyn mal aýylynan kúdik keltirilgen Qyzylorda qalasynyń turǵyny anyqtaldy. Qazirgi tańda oryn alǵan oqıǵa boıynsha mán-jaıdy qarap, shara qoldaný úshin qujattar men aıǵaq zattar Jalaǵash aýdandyq polısıa bólimine ótkizildi, - delingen habarlamada.