Buǵylardyń popýlásıasyn baqylaýdy kúsheıtý úshin jalpy alǵanda 9 spýtnıktik jaǵabaý paıdalanylady.
İle-Balqash rezervatynda buqar buǵysynyń úshinshi engizilýi júzege asyrylady. Bul engizý jumystarynyń barlyq ýaqyttaǵy sany boıynsha eń kóbi bolyp tabylady, dep habarlaıdy Almaty-akshamy.kz.
Mamandardyń aıtýynsha, alǵashqy engizilim 2019 jyly, rezervat aýmaǵyna alǵashqy 5 buqar buǵysy qonystanǵan kezde júzege asqan bolatyn. 2020 jyly olarǵa taǵy 14 eresek buǵy men 1 buǵynyń laǵy qosyldy.
«Ekologıa mınıstrligi jabaıy tabıǵat qorymen (WWF) birge 61 buǵy engizýdi josparlap otyr jáne bul bir jyldaǵy rekordtyq kórsetkish. Shyǵarý aımaǵynda tabıǵatqa shyqqan buǵylardy baqylaý úshin foto tuzaqtar qoıyldy. Buǵylardyń popýlásıasyn baqylaýdy kúsheıtý úshin jalpy alǵanda 9 spýtnıktik jaǵabaý paıdalanylady», - dep habarlady Almaty oblystyq orman sharýashylyǵy jáne janýarlar dúnıesi aýmaqtyq ınspeksıasynyń bólim basshysy Leonıd Sıdorenko.
Mamandardyń aıtýynsha, bul tehnologıalar búkil álemde qoldanylady, olardyń kómegimen buǵynyń qozǵalysyn baqylaýǵa bolady. Qurylǵylar aýyrtpalyqsyz ornatylady jáne janýarlarǵa eshqandaı zıan keltirmeıdi.
Buqara buǵysy Almaty oblysy Balqash aýdanynyń aýmaǵynda keń taralǵan. Alaıda, ótken ǵasyrdyń basynda bul túr joǵala bastady. Birneshe onjyldyq ótken soń, ol Qazaqstannyń tabıǵatynan múldem joǵalyp ketken bolatyn. Búgingi tańda buqar buǵysy búkil álemde 3500 danany quraıdy.
«İle-Balqash rezervatynda buqar buǵylarynyń popýlásıasyn qalpyna keltirý óte tabysty ótýde. Biz buǵylardyń beıimdelgenin jáne buǵylardyń sátti tóldeýin kórip ortyrmyz. Aldyn ala baǵalaý boıynsha, qazirgi shyǵarylym men týylǵan buǵylardy eskersek, tabıǵatta 100-ge jýyq buǵy bar», - dedi óz sózinde WWF Ortalyq Azıa baǵdarlamasynyń dırektory Grıgorıı Mazmanáns.
Toǵaı nemese buqar buǵysy Qazaqstannyń Qyzyl kitabyna engizilgen jáne Buqar buǵylaryn saqtaý jáne qalpyna keltirý máseleleri boıynsha ózara túsinistik týraly memorandýmmen halyqaralyq deńgeıde qorǵalady. Dúnıejúzilik jabaıy tabıǵat qorynyń arqasynda buǵy 100 jyl ishinde alǵash ret Ońtústik Balqash aımaǵynda paıda boldy.
Buqar buǵylarynyń Balqash aýdanynyń jabaıy tabıǵatyna oralýy jolbarys reıntrodýksıasy baǵdarlamasynyń mańyzdy kezeńi bolyp tabylady, ony Reseıdiń WWF jáne QR Ekologıa, geologıa jáne tabıǵı resýrstar mınıstrligi birlesip júzege asyryp keledi.
İle-Balqash rezervatynyń aýmaǵynda jolbarystyń mekendeıtin jerine jaramdy ekojúıeni qalpyna keltirý josparlanyp otyrǵany belgili. Reıntrodýksıalaý baǵdarlamasyna saqtalyp qalǵan jabaıy tabıǵatty qorǵaý jáne jolaqty jyrtqysh, sondaı-aq qulan, aqbóken jáne qaraquıryq rasıonynyń negizi bolyp tabylatyn tuıaqty janýarlar (toǵaı buǵysy, elik, jabaıy qaban) popýlásıasyn qalpyna keltirý jónindegi is-sharalar josparlanǵan.
