2025 jyldyń 29–30 qyrkúıeginde QyzPU delegasıasy Indonezıanyń Bogor qalasynda ótken Asia Hub Annual Meeting 2025 halyqaralyq samıtine qatysty.
Aýqymdy shara IPB University bazasynda uıymdastyrylyp, osy jyldyń basty taqyryby «TDM 4 jáne sapaly bilim berý salasyndaǵy jahandyq áriptestik» boldy, - dep habarlaıdy Aqshamnews.kz.
Ýnıversıtet atynan Halyqaralyq yntymaqtastyq bóliminiń basshysy, PhD doktor Saltanat Jakýbaeva jáne Pedagogıka jáne psıhologıa ınstıtýtynyń mektepke deıingi bilim berý kafedrasynyń baǵdarlama kóshbasshysy, pedagogıka ǵylymdarynyń kandıdaty, profesor m.a. Aqgúl Jubandykova qatysty.
Samıt bilim berý salasyndaǵy aımaqtyq jáne jahandyq sarapshylardy, ǵylymı-zertteý uıymdaryn jáne ýnıversıtet ókilderin biriktirdi. Qatysýshylar BUU-nyń Turaqty damý maqsaty 4 (SDG 4) sheńberinde ınklúzıvti jáne sapaly bilim berýdi qamtamasyz etý joldaryn talqylady.
İs-sharany Mıchıgan memlekettik ýnıversıtetiniń (Michigan State University) Bilim berý koleji uıymdastyrdy. Seriktester qatarynda UNICEF Indonesia, SEAMEO STEM bilim berý ortalyǵy jáne Universitas Padjadjaran ýnıversıtetiniń Turaqty damý maqsattary ortalyǵy bar.
Eki kúnge sozylǵan samıt barysynda qatysýshylar aımaqtyq bilim saıasatynyń basym baǵyttaryn saralap, úzdik tájirıbelermen bólisti. Sonymen qatar Azıadaǵy bilim berýdi transformasıalaý jáne turaqty yntymaqtastyq qaýymdastyǵyn qurý máseleleri kóterildi.
Qazaqstan atynan sóz sóılegen Saltanat Jakýbaeva joǵary bilimniń ınternasıonaldanýy, sıfrlyq transformasıa jáne áıelderdiń akademıalyq kóshbasshylyǵy taqyryptarynda tájirıbe bólisti.
«Bul samıt – tájirıbe almasýǵa, jańa seriktestik baǵyttaryn belgileýge arnalǵan mańyzdy platforma. Sıfrlyq bilim berý men ınklúzıa baǵyttarynda jetekshi ýnıversıtettermen baılanys ornatý – biz úshin úlken múmkindik», – dedi Saltanat Jakýbaeva.
Bul sharaǵa qatysý ýnıversıtettiń halyqaralyq yqpaldastyqty arttyrýǵa, ınovasıalyq bilim berý tájirıbesin damytýǵa jáne BUU Turaqty damý maqsattaryna qol jetkizýge belsendi atsalysýǵa degen umtylysyn kórsetedi.