Kóliktegi polısıa departamentiniń kınologıalyq qyzmet ortalyǵy 2006 jyldan beri jumys istep keledi.
Búginde kólik polıseıleri adal serikteri – qyzmettik ıttermen birge elimizdiń temirjol vokzaldarynda, jolaýshylar poıyzdarynda jáne áýejaılarda qoǵamdyq tártipti saqtaý, azamattardyń qaýipsizdigin qamtamasyz etý, esirtkiniń zańsyz aınalymynyń aldyn alý jáne qylmystyq qol suǵýshylyqtyń jolyn kesý baǵytynda qyzmet atqaryp keledi, - dep habarlaıdy Aqshamnews.kz.
Qazirgi ýaqytta ortalyqta orys spanıelderi men labradorlardan bastap, nemis jáne belgıalyq ovcharkalarǵa deıin ártúrli tuqymdaǵy 33 qyzmettik ıt bar. Barlyǵy da arnaıy daıyndyqtan ótip, kúndelikti qyzmette esirtki quraldary men jarylǵysh zattardy anyqtaý sekildi jaýapty mindetterdi oryndaýǵa kómektesedi. Qyzmettik ıtterdiń erekshe ıis sezý qabiletiniń arqasynda adam baıqamaıtyn jerlerden de tyıym salynǵan zattar tabylyp jatady. 2025 jyldyń basynan beri kınologtar qyzmettik ıtterdi 4 myńnan astam ret qoldanǵan. Sonyń nátıjesinde 150-ge jýyq esirtki qylmysy áshkerelenip, 150 keliden astam esirtki zaty tárkilendi. Máselen, salada toǵyz jyl qyzmet etip júrgen belgıalyq ovcharka Sherlıdiń eńbegi erekshe. Onyń kómegimen tárkilengen esirtkiniń jartysyna jýyǵy tabyldy.
Solardyń biri – Almaty – Qostanaı baǵytyndaǵy poıyz jolaýshysynan 3 keliden astam gashıshti anyqtaý oqıǵasy. Sondaı-aq nemis ovcharkasy Irga da talaı qyraǵylyǵymen tanyldy. Ol Qyzylorda – Semeı poıyzynda jolaýshy sómkesinen esirtki ıisin sezip, qojaıynyna belgi bergen. Sonyń nátıjesinde kúdiktiden 2 keli keptirilgen qarasora alyndy. Inspektor-kınolog Qýanysh Baıpaqbaıdyń aıtýynsha, qyzmettik ıtterdi oqytý avstrıalyq ádisteme – klıker tásili boıynsha júrgiziledi. Bul – shartty belgiler júıesine negizdelgen ádis, munda basty belgi – shertpe dybys. Osy tásildiń arqasynda ıt tyıym salynǵan zatty tapqan kezde úrmeı, óz jetekshisine naqty belgi beredi. Máselen, Avstrıadan ákelingen ovcharka Doddı dál osy ádispen daıyndalyp, jarylǵysh zattardy izdeýge beıimdelgen.
Ortalyq bastyǵy Qanat Abdrahmanovtyń aıtýynsha, bir jasqa deıingi kúshikter Almaty qalasyndaǵy QR İİM kınologıalyq ortalyǵynda bastapqy daıyndyqtan ótedi, sodan keıin aımaqtyq bólinisterge jiberiledi. Orta eseppen qyzmettik ıtterdiń jumys kezeńi 8–10 jylǵa sozylady. Osy ýaqyt ishinde olar polıseıler úshin tek senimdi seriktes qana emes, naǵyz adal dosyna aınalady. Qyzmettik ıtterdi paıdalaný – kólik polıseıleri jumysynyń ajyramas bóligi. Kınologtar men olardyń tórt aıaqty kómekshileriniń quqyqtyq tártipti qamtamasyz etýdegi jáne qylmyspen kúrestegi eńbegi ólsheýsiz ekendigin tájirıbe aıqyn kórsetip otyr.