Májilis depýtaty Rınat Zaıyt bas prokýror Berik Asylovqa depýtattyq saýal joldap, olıgarhıalyq toptardan qaıtarylyp jatqan aktıvterdiń halyqqa paıdasy men olardyń bolashaqtaǵy taǵdyryna qatysty ashyq aqparat talap etti, - dep habarlaıdy Aqshamnews.kz tilshisi.
Depýtat Rınat Rıfhatuly Zaıyt Memleket basshysy Qasym-Jomart Toqaev jarıalaǵan "Ádiletti Qazaqstan" tujyrymdamasynan keıin ádilettilik uǵymy qoǵamda keń qoldanysqa engenimen, onyń tolyq júzege asýy úshin áli de batyl qadamdar qajet ekenin atap ótti. Onyń aıtýynsha, Qarjy mınıstrliginiń janyndaǵy Aktıvterdi qaıtarý komıteti sońǵy ýaqytta yqpaldy tulǵalardyń kúmándi baılyǵyna qatysty tergeýdi kúsheıtip, naqty nátıjelerge qol jetkize bastaǵan.
Máselen, jýyrda Bolat Nazarbaevtyń uly Nurbol Nazarbaev sot sheshimimen 57 mlrd teńge kólemindegi aktıvinen aıyrylyp, memleketke qaıtaryldy. Sonymen qatar oǵan 925 mln teńge aıyppul jáne 230,4 mln teńge aıypaqy salynǵan. Depýtat bul úderisti oń baǵalaı otyryp, qoǵamda ásirese "Altyn orda" bazary men Almaty qalasy men oblysyndaǵy zańsyz jer telimderi jaıly suraqtar kóp ekenin aıtty.
"Bul nysandardyń tárkilengen aktıvterdiń qatarynda bar-joǵy belgisiz. Sot prosesteri jabyq ótkendikten, halyq olardyń taǵdyry jaıynda naqty aqparat ala almaı otyr", – dedi ol.
Zaıyttyń aıtýynsha, qaıtarylǵan aktıvterdiń qanshalyqty halyq ıgiligine jaratyny, jumys oryndarynyń saqtalýy sıaqty máseleler túsiniksiz kúıde qalyp otyr.
Sondyqtan depýtat bas prokýrorǵa mynadaı usynystaryn jetkizdi:
- Nurbol Nazarbaevtyń barlyq aktıvterine tolyq túgendeý júrgizip, zańsyzdaryn memleket menshigine qaıtarý;
- Zańsyz aktıvterdiń qaıtarylǵannan keıingi paıdalanylýy týraly tolyq aqparatty ashyq jarıalaý;
- "Altyn orda" bazary men Almaty qalasy jáne oblysyndaǵy zańsyz jer telimderine qatysty tergeýdi bastaý.
"Ádiletti Qazaqstan" qaǵıdatyn júzege asyrý úshin bul máseleler qoǵamǵa ashyq ári aıqyn túsindirilip, halyqqa naqty paıdasyn tıgizýi tıis", – dep túıindedi depýtat Rınat Zaıyt.