Threads áleýmettik jelisinde Astanadaǵy doner satatyn oryndardyń birinde qyzmetker áriptesiniń ústine ystyq maıdy tógip jibergen sát túsirilgen vıdeo tarady. Bul oqıǵa jelide qyzý talqylanyp jatyr, - dep jazady Aqshamnews.kz.
Ne boldy?
Vıdeodan qyzmetker ystyq maı quıylǵan ydysty alyp shyqqany kórinedi. Bir sátte ol tepe-teńdigin joǵaltyp, ydys tóńkerilip, maı ekinshi qyzmetkerdiń ústine quıylady.
Post avtory oqıǵa saldary óte aýyr bolǵanyn jazady. Onyń aıtýynsha, kompanıa zardap shekken qyzmetkerdiń jaraqaty úshin jaýapkershilik almaǵan.
"Onyń búkil arqasy irińdep jatyr. Kompanıa jaýapkershilikti moınyna alǵysy kelmeıdi. Bul - sumdyq. Múmkin, teri aýystyrý operasıasy qajet bolatyn shyǵar", – delingen jazbada.
Kompanıa ne deıdi?
Jelide vıdeo keń tarap ketken soń, oqıǵaǵa qatysty kompanıa resmı pikir bildirdi.
Mekeme málimdemesinde zardap shekken qyzdyń emine aqy tólenbedi degen aqparat shyndyqqa sáıkes kelmeıdi dep kórsetilgen.
"Oqıǵa rasymen de shamamen bir aı buryn bizdiń dámhanalardyń birinde bolǵan. Bul óte jaǵymsyz jaǵdaı – qyzmetkerdiń ústine abaısyzda ystyq maı tógilgen. Biz birden barlyq qajetti kómekti kórsettik, zardap shekken qyzdyń ata-anasymen kezdestik, em-domyna aqy tóledik jáne ótemaqy berdik", – delingen Instagram paraqshasyndaǵy málimdemede.
Eńbek mınıstrligi men polısıa ne deıdi?
Tengri Life tilshileri bul jaǵdaıǵa baılanysty Eńbek mınıstrligine jáne Astana qalalyq polısıa departamentine suraý salǵan.
"Eger jumystaǵy jazataıym oqıǵadan keıin zardap shekken adam ózine em-dom shyǵyndary nemese ótemaqy tólenýi kerek dep sanasa, biraq jumys berýshimen kelisimge kele almaǵan jaǵdaıda, turǵylyqty mekenjaıy boıynsha eńbek ınspeksıasyna júginýi qajet. Árbir jaǵdaı jeke qaralady", – dedi Eńbek jáne halyqty áleýmettik qorǵaý mınıstrliginiń baspasóz qyzmeti.