Áleýmettik jelilerde Almaty taýynda qazaqstandyqtyń joǵalyp ketkeni týraly habar tarady. Bul jaǵdaıǵa qatysty qalalyq TJD baspasóz qyzmeti pikir bildirdi, - dep jazady Aqshamnews.kz.
Áleýmettik jelilerde ne jazyldy?
Threads jelisinde Alan esimdi jigitti izdeý týraly habarlama jarıalandy:
"Alandy izdeımiz, jasy – 20, boıy – 175–180 sm. 27 shildede tańerteń Medeý jaǵynan Jastar shyńyna (pık Molodejnyı) qaraı taýǵa ketken, sodan beri baılanysqa shyqpady. Keıingi ret tańerteń, 27 shildede habarlasqan", – delingen jazbada.
Ol kezde jigit qyzyl flıska (uzyn jeńdi kofta), qara shorty, qara krosovkı, qara kepka kıip júrgen. Sonymen qatar aq-sur rúkzagy bolǵan. Janynda qosymsha losıny, qara kúrteshe bolýy múmkin.
"Ol Jastar shyńyna Medeý jaǵynan 1B baǵytymen kóterilgen bolýy múmkin. Tańǵy 6:00 shamasynda ony bireýler Medeýde asfált aıaqtalatyn tustan kórgen. Múmkin, ol Alma-Arasan jaǵynan (1A marshrýty) nemese Medeý jaǵynan (1B marshrýty) túsken shyǵar. Kimde-kim ony kórse nemese qandaı da bir aqparat bilse, +7 701 764 64 74 nómirine shuǵyl habarlasýyńyzdy suraımyz. TJM izdeý jumystaryn bastap ketti, biraq aýmaq óte úlken, sondyqtan eriktiler – izdeýge shyǵýǵa daıyn adamdar, dron ıeleri men ıtteri bar kınologtar óte qajet", – delingen habarlamada.
TJD ne deıdi?
Almaty qalalyq TJD baspasóz qyzmeti bul jaǵdaıǵa pikir berdi:
"27 shildede keshki saǵat 23:02-de Medeý aýdanynda izdestirý-qutqarý jumystary bastaldy. Tańerteń taýǵa ketken 20 jastaǵy jigittiń joǵalǵany týraly habar kelip tústi. Ol 17:00-de qaıtyp kelýge tıis bolǵan. Baılanys tek tátesi arqyly bolǵan – geolokasıa qosylmaǵan. Ol jyly kofta, shorty men krosovkı kıip júrgen. Bul ýaqytta taýda jańbyr men burshaq jaýyp, 4000 metr bıiktikte qar túsken", – delingen habarlamada.
İzdeý jumystary Jastar shyńynyń mańynda (4147 m) bastalǵan. Oǵan "Medeý" postynyń jáne "Tuıyq-Sý" baqylaý-qutqarý pýnktiniń qutqarýshylary tartyldy.
"Qutqarýshylar Mynjylqyǵa kóterilip, Jastar shyńyna qaraı jaıaý baǵyt alǵan. Jastar, Tıtova jáne T1 shyńdary tekserildi – iz-túz tabylmady. Mynjylqy ústirtinde TJD, eriktiler jáne drondar qatysqan jedel shtab quryldy. "Qazavıaqutqarý" tikushaǵy daıyn, alaıda aýa raıy qolaısyz – 1800 metrden joǵary bultty, naızaǵaı, sekýndyna 20 metrge deıin jel soǵyp tur, bul ushýǵa kedergi", – dep málimdedi vedomstvo.
Qutqarýshylardyń keńesteri
Buǵan deıin tájirıbeli qutqarýshy Vadım Pak taýǵa shyqpas buryn este saqtaý kerek birneshe keńes bergen:
-
Jalǵyz barýǵa bolmaıdy, tipti gıdpen bolsańyz da, marshrýtty aldyn ala zertteńiz;
-
Kıim men aıaqkıimdi aýa raıy men jer jaǵdaıyna saı tańdańyz – alystan kórinetin ashyq tústi bolsyn;
-
Rúkzakta mindetti túrde jyly kıim, tamaq, dári-dármek qobdıshasy, fonarık, paýerbank jáne termos bolý kerek;
-
Jolǵa shyǵar aldynda týystaryńyzǵa marshrýtty, qaıtý kúnin aıtyp, toptaǵy ár adamnyń sýretin jiberip qoıyńyz.
Qosymsha keńester siltemede berilgen.