Búgin, 10 naýryzda, qazaq kınosynyń altyn qoryna aınalǵan «Qyz Jibek» fılminiń rejıseri Sultan-Ahmet Qojyqovtyń týǵanyna 100 jyl toldy. Aıtýly dataǵa oraı Almatyda «Qazaqfılm» kınostýdıasynyń Juldyzdar aleıasyndaǵy estelik-juldyzyna gúl shoqtary qoıyldy. Qazaq KSR Eńbek sińirgen óner qaıratkeriniń qurmetine týystary, tanymal kınematograftar jáne «Qazaqfılm» kınostýdıasynyń ujymy jınaldy.
Kórnekti rejıserdiń mereıtoıyna arnalǵan is-shara Sultan-Ahmet Qojyqov atyndaǵy №39 mamandandyrylǵan lıseıdiń qabyrǵasynda jalǵasty. Lıseı oqýshylary shyǵarmashylyq kesh uıymdastyryp, qonaqtarǵa mereıtoı ıesiniń ómiri men shyǵarmashylyǵynan teatrlandyrylǵan qoıylym usyndy.
İs-sharaǵa S.Qojyqovtyń jıeni Sáýle Qojyqova, belgili kıno qaıratkerleri: rejıser Bolat Shárip, akter-prodúser Oljabaı Musabekov, S. Qojyqov týraly túsirilgen «Voına ı mır» derekti fılminiń avtory Bolat Núsimbekov, rejıser-dokýmentalıst Satybaldy Tekeev, tanymal akter Erbolat Toǵyzaqov jáne qalanyń bilim berý uıymdarynyń basshylary qatysty.
«Qyz-Jibek» fılminiń jasalý tarıhy týraly Qazaqstan Respýblıkasynyń eńbek sińirgen qaıratkeri, «Qulager» Ulttyq kınosyılyǵynyń laýreaty, osy ańyzǵa aınalǵan fılmde bas rejıserdiń kómekshisi bolyp jumys istegen rejıser Bolat Shárip aıtyp berdi.
«Memlekettik kınoǵa taqyryptyq jospardy bekitý úshin Máskeýge barǵan kezekti saparynda burynǵy kınostýdıa basshysy Kamal Smaıylovke usynylǵan senarılerdiń birin bekitpedi. Sodan memlekettik komıtettiń bas redaktoryn Kamal Seıtjanuly oǵan basqa, neǵurlym qolaıly senarımen almastyrýǵa ýaqyt berýge kóndirdi. Almatyǵa oralǵan soń, ol Ǵabıt Músirepovke qońyraý shalyp, «Qyz Jibek» pesasyn kınosenarııge aınaldyrýdy ótindi. Ǵ.Músirepov bir aı ishinde Smaıylovtyń tapsyrmasyn oryndady. Osylaısha senarı qutqarylyp, keıinnen ulttyq kınoshedevrge aınaldy», – dep Bolat Shárip esteliktermen bólisti.
Aıta ketken jón, Sultan-Ahmet Qojyqov 1923 jyly 10 naýryzda dúnıege kelgen. Ol óziniń eńbek jolyn 1953 jyly ınstıtýt bitirgennen keıin kınostýdıada bastady. Qojyqovtyń alǵashqy táýelsiz týyndysy – «Ana men bala» boldy, keıinirek «Biz Jetisýdanbyz» kartınasyn túsirdi. S.Qojyqovtyń qazaq kıno óneriniń tólqujatyna aınalǵan «Qyz Jibek» kınotýyndysynyń premerasyna bıyl 50 jyl toldy.