Ansamb quramynda 30 qyz bala (úlken jáne kishi top) bolsa, repertýarda otyzǵa tarta án, terme bar
Batysqazaqstandyq «Qyz Jibek» dástúrli ánshiler ansambli Túrkıanyń Izmır qalasynda ótken «International Foça Forgotten Children Games and Dance Festival» atty halyqaralyq festıvál-baıqaýynda» birinshi orynǵa ıe boldy, dep habarlaıdy Almaty-akshamy.kz QazAqparatqa silteme jasap.
Atalmysh baıqaýǵa Ázirbaıjan, Bolgarıa, Rýmynıa, Grýzıa, Makedonıa, Kosovo, Bosnıa jáne Gersovına, Grekıa, Serbıa, Moldova, Ýkraına, Túrkıa, Qazaqstan elderinen myńǵa jýyq bala qatysyp, baq synady.
«Qyz Jibek» ansamblin 2011 jyly belgili ánshi-termeshi, sazger, ustaz, «Eren eńbegi úshin» medaliniń ıegeri Baıan Qabıeva Kaztalov aýdany, Jalpaqtal aýylynda uıymdastyrǵan bolatyn. Sodan beri respýblıkalyq, halyqaralyq baıqaýlarda top jaryp úlgergen ansámblge Baıan Qubaıqyzymen birge onyń uly Asylhan Boltanov jetekshilik etip keledi.
Asylhan Qymyzbaıulynyń aıtýynsha, qazirgi kezde ansamb quramynda 30 qyz bala (úlken jáne kishi top) bolsa, repertýarda otyzǵa tarta án, terme bar.
«Ansámbl qazaqtyń tól ónerin nasıhattap qana qoımaı, tatar, orys, qyrǵyz, túrik halyqtarynyń ánderin de oryndaıdy. Bul joly meniń «Qazaq eli jasasyn!» atty ánime qosa Mahambettiń termesin, túriktiń besik jyryn shyrqady. 23 sáýirde Túrkıanyń Ulttyq táýelsizdik kúnimen qosa Balalar kúni de atalyp ótiledi. Ol elde balalarǵa erekshe kóńil bólinedi eken. Mınıstrlikten kelgen basshylar ár topqa kelip, «Qosh keldińder!» dep qurmet kórsetti. Festıvál qorytyndysynda birinshi orynmen birge Bolgarıada 29 maýsym – 3 shilde aralyǵynda ótetin «Sunny days in Sunny Beach» atty halyqaralyq baıqaýǵa joldama aldyq», - dedi A.Boltanov.