Kúndelikti ómirde, aınalamyzda bolyp jatqan oqıǵalardy qoıyn dápterime túrtip júretinim bar. Kúndelik betindegi sol jazbalarymmen ádettegideı sizdermen taǵy da bóliseıin.
BES MYŃ
Aıdana esimdi jas kelinshek bosana salysymen, sál ál jınap alǵan soń WhatsApp-pen kúıeýine jazyp jibergen ǵoı, «Akýsherge, myna nómirge aqsha salyp jibershi» dep. Artynsha birer mınýttan soń «3800» dep álginde ǵana ómir esigin ashqan nárestesiniń salmaǵyn jazǵan.
Birazdan soń kúıeýinen «Roddomnan birdeńe satyp alyp jatyr ma ediń, saldym akýsherińe 3800 teńge» degen jazba keledi. Ashýlanyp, tútigip ketken kelinshegi: «Uıat-aı, 3800-di qalaı saldyń?! 5000 sal», – degen jazbasyn jóneltedi. Kúıeýinen ile-shala: «Saldym. 2200» degen jaýap kelipti ǵoı, qysqasy.
Osy oqıǵaǵa jazylǵan pikirler de ózinshe bir qyzyq.
«Maǵan «olveız» ákep bershi desem, «orbıt» ákep tur ǵoı. Roddomda saǵyzdy ne isteımin?!».
«Men dárigerlerge túski asqa shashlyq alyp kelshi desem, kelip tur, qolynda shashkı, áreń taptym ǵoı dep».
«2200 teńge emes, 1200 berý kerek, akýsher 1000 teńgesin qaıtarsyn. 6000 berip jibergen kúıeýi».
«Nesine jyndanasyńdar, áıelder! Senderge de balǵa ákep bershi desek, ara ákelip turasyńdar ǵoı».
JASTYQ
Shildehana. Ortaǵa ata-ájesi nemeresin balanyń qolarbasymen alyp shyqty. Sońdarynda uly men kelini, ıaǵnı sábıdiń jas ata-anasy. Júzderi balbul janyp tur.
Kelin tizeden sál joǵary turatyn búrmeli aq kóılek, syrtynan kógildir tústi uzyn pıdjak kıipti. Aıaǵynda bıik ókshe. Qulaǵyndaǵy syrǵasy da jalt-jult etip jarasyp tur. Bári talǵammen.
Qyzyn kórgen tórde otyrǵan anasy «qysqa kıip alǵany nesi» dep qysylyp, jan-jaǵyna alańdap mazasyzdana qarap ketti, elge unamaı qalǵan joq pa degendeı. Árıne, ana retinde qyzynyń abyroıyn oılaǵany.
Qudaǵıy da suńǵyla eken, seze qoıdy. «Eshteńe etpeıdi. Ózim ápergem. Jarasyp tur», – dedi.
Iá, ersi qylyq kórsetip jatqan kelin joq. Bárine ımene qarap, ıbamen sálemdesip júr. Ata-eneniń, kúıeýiniń aldyna túsip ketip jatqan jeri taǵy joq. Zamanaýı kelin. Eń bastysy – enemen syılastyǵy joǵary.
Nebári 22 jasta. Birer jyldan soń etegi uzara túsedi, ýaqyt ózi soǵan ákeledi. Qoryqpańyz, únemi solaı qysqa kıip júredi eken dep. Jastyqta bári úılesimdi!
Búrkenbeı-aq, oranbaı-aq ımandy, ıbaly bolýǵa ábden bolady!
IMAN
Taksıdemin. Júrgizýshi jer úıler jaqqa buryldy. Kóshe qarańǵy.
– Bireýdiń amanattaǵan zaty bar edi, sony berip keteıin, – dedi, bizge eskertkeni.
Qarańǵy tar kóshege kelip toqtady. Syrtqa mashınasynyń jaryǵy túsip tur. Áldekimge «brat, zvondap jibershi óziń, ne dostýpen bolyp tur nómiri» dedi.
Sálden soń úıden 19-20 jastaǵy qyz shyqty. Jeleń. Shashy uzyn, býyp qoıypty. Kórikti ózi. Zatty berip jatqan júrgizýshi jigit aǵasyna tiktep bir qaramady, telefonyn shuqylap tur. Zatty jetkizgen adamnyń qyzmeti úshin aqsha aýdaraıyn dep jatyr ma eken. Bir kezde telefonynyń syrtqy qabyn ashyp, sonda turǵan aqshany alyp, júrgizýshige berdi. İshke kirip ketti.
Men úshin ıman, ıba hıdjabta emes. Qyz balanyń er adamǵa tiktep qaramaǵanynyń ózi – ımandylyǵy.
Ótkende TıkTokta bir qyz (álde kelinshek) hıdjabynyń syrtynan qalaı syrǵa taǵýǵa bolatynyn kórsetip tur qurbysyna. Syrǵany oramalynyń syrtynan tesip ilip qoıdy. Janym-aý, qulaqtyń syrǵalyǵy da áýretti jer me, sonda? Túsinsem buıyrmasyn.
Syrǵa da áıel zatynyń kórkin ústeı túsetin sándik aksesýar ǵoı. Ertede qazaq qyzdary taqqan kúmis syrǵa, bilezik, shashbaý, sholpy qandaı edi! Qazir de taǵyp júrmiz.
RAHMET!
Metroǵa kirdik. Avtobýspen 30 mınýt júretin jerge 9 mınýtta zyr etkizip jetkizip salady. Munda kóbine jastar júredi. Almaty – jastar qalasy.
Tólem jasaıtyn jerge kelgende bir bozbalanyń kartasynda aqsha bolmaı shyqty.
– Sender júre berińder. Sońdaryńnan baramyn, avtobýspen, – dep edi álgi bala, arǵy betke ótip alǵan eki dosy ókingen keıippen turyp qaldy. Ketkisi joq ekeýiniń de. Bergi bettegi jigit te «qap!» dep, olardan qalyp bara jatqanyna ókingendeı.
Keri buryla bergen oǵan qurbym:
– Áı, bala, toqtashy, mynany kórshi, biraq ishinde bar-joǵyn bilmeı turmyn, – dep sómkesiniń túbinde, birazdan beri qoldanylmaı jatqan ekinshi kartasyn usyndy.
Bar eken ishinde aqsha. Bozbalanyń kózi janyp ketti qýanǵannan. «Rahmet, apaı!» dedi «qutqarýshy» qurbyma. Eki dosy da birinen soń biri «rahmet, apaı, rahmet» dep júgirip ketti. Asyǵys ózderi. Máz. Bólinbeı birge ketip bara jatqandary sondaı jaqsy!
– Jańaǵy balalardyń kóp rahmetine, qýanǵanyna qýanyp kele jatqanym! – dedi bir kezde qurbym.
Jaqsylyqtyń úlken-kishisi bolmaıdy. Jaqsylyq jaqsylyqty shaqyrady. Erteń bul jaqsylyq bizdiń de balalarymyzdyń aldynan shyǵady. Senińiz.