Sońǵy kúnderi búkil Qytaı jáne álemdik baspasózdiń nazaryn aýdarǵan saıahattaýshy pilder qazirgi tańda ormanda uıyqtap jatyr. Ony baqylaý drondar arqyly júrgizilýde.
15 jabaıy pil jáne úsh pildiń tóli 15 aı buryn Qytaıdyń ońtústik-batysyndaǵy týǵan jerlerinen belgisiz baǵytqa jolǵa shyqqan bolatyn. Sodan beri shaǵyn eldi mekender, tipti úlken qalalar arqyly 500 shaqyrymǵa jýyq joldy júrip ótti, dep habarlady Almaty-akshamy.kz Bbc.com caıtyna siltemelep.
Seısenbide qatty jańbyr jaýyp, pilder ormanda uıqyǵa jatty.
Qytaılyq CGTN telearnasynyń habarlaýynsha, pilder saıahattap júrgen Iýnnan provınsıasynyń bıligi arnaıy bólgen 14 dron men tabyndy baqylaıtyn 500-ge jýyq adam eldi mekenderdegi joldardy jaýyp, janýarlardy ońtústik-batysqa, úıge qaraı baǵyttaýǵa tyrysýda.
Sońǵy ýaqytqa deıin bul áreketter sátsiz aıaqtaldy. Biraq qazir tabyn úıge qaraı burylǵan sıaqty, búginde olar Laos pen Mánma shekarasyndaǵy Sıshýanbanna aımaǵyndaǵy Menánszy qoryǵynda júr.
Iýnnan orman órt sóndirý brıgadasynyń baqylaýlaryna sáıkes, pilderdiń biri tabynnan bólinip, qazir odan tórt shaqyrym qashyqtyqta júr.
Óziniń rekordtyq joryǵy kezinde tabyn mıllıondaǵan ıýánǵa egin jep, taptap, birneshe ǵımarattarǵa zaqym keltirip, kóptegen jergilikti turǵyndardy úreılendirip, esikter men terezelerge muryndaryn suǵyp, eldi shoshytty.
Pilder tipti alty mıllıon halqy bar Kýnmın qalasyna jol tartty.
Yshan eldi mekeninen pilder alty mıllıonynshy Kýnmınge aparatyn negizgi tas jolmen ótti.
Azıalyq (Úndi) pilder tabynynyń ádettegi tirshilik etý ortasynan alys qashyqtyqqa ketý sebebi túsiniksiz bolyp qalady.
Jabaıy azıalyq (Úndi) pilder Qyzyl kitapqa engizilgen. Qytaıda olardyń sany úsh júzge jýyq, olardyń kópshiligi Iýnnan provınsıasynda.
Ǵalymdardyń aıtýynsha, Iýnnan pilderi mekendeıtin jerlerinen munshalyqty alys ketpegen.