2025 jylǵy 21 qazanda Astana qalasyna Qytaıdan atpen shyqqan saıahatshylar - Qýanbek Túsiphanuly men jubaıy Jaına Erkinqyzy elordaǵa jetti.
Tarbaǵataı óńirinen shyqqan jas jubaılardyń basty armany - qazaq eliniń júregi, bas qalasy Astanany kórý bolǵan.
Eki aıdan astam ýaqyt boıy myńdaǵan shaqyrym jol júrip kelgen jupty «AMANAT» partıasy Astana qalalyq fılıalynyń Atqarýshy hatshysy Muhammed Bolysbek arnaıy qabyldap, qurmet kórsetti.
«Qýanbek pen Jaınanyń bul sapary – otansúıgishtik pen rýhanı baılanystyń erekshe úlgisi. Ata-baba izimen at jalynda júrip, Elordaǵa jetý - úlken erlik. Biz mundaı azamattardy árdaıym qoldaımyz. Bul sapar - Respýblıka kúni qarsańynda kóńil tolqytqan erekshe oqıǵa boldy», – deıdi «AMANAT» partıasy Astana qalalyq fılıalynyń Atqarýshy hatshysy Muhammed Bolysbek.
Kezdesý barysynda partıa ókilderi saıahatshylarǵa Astana qalasynyń damýy men eldegi jańalyqtar týraly aıtyp, estelik syılyqtar tabys etti.
«Bizdiń armandaǵan Astanamyz – dál osyndaı eńseli, kórkeıgen, rýhy bıik qala eken. Ata jurtqa, qazaq eline degen saǵynysh pen qurmet – bizdi jol boıǵy qıyndyqtarǵa moıytqan joq. Eń bastysy - týǵan eldiń topyraǵyna taban tıgizip, júrekpen seziný», - dep aǵynan jaryldy Qýanbek Túsiphanuly.
Jaına Erkinqyzy da Elorda turǵyndaryna kórsetken qurmet pen qoldaý úshin alǵysyn bildirdi.
Aıta keteıik, Qýanbek Túsiphanuly men Jaına Erkinqyzy 2025 jyldyń 8 tamyzynda Qytaı Halyq Respýblıkasynan, naqtyraq aıtqanda Tarbaǵataı aımaǵynan attanyp, eki aıdan astam ýaqyt ishinde birneshe óńirdi artqa tastap, Elordaǵa jetken. Bul - qazaqtyń kóshpeli mádenıetin jańǵyrtyp, ulttyq rýhty dáripteýdiń erekshe bir joly.