Qytaıda atom energetıkasynyń damýy 1990 jyldary bastalyp, búgingi kúni elde 57 ıadrolyq reaktor jumys isteıdi. Alǵashqy atom elektr stansıalary iske qosylǵannan beri elde birde-bir apat tirkelmegen. Sarapshylar bul kórsetkishti qaýipsizdik sharalarynyń qatań saqtalýymen baılanystyrady.
Qazirgi ýaqytta Qytaıda úshinshi býyn reaktorlary qoldanysta. Olardyń ishinde eń iri stansıalardyń biri – soltústik-shyǵysta ornalasqan Tánvan AES-i. Stansıa 300 gektardan astam aýmaqty alyp jatyr jáne teńiz jaǵalaýynda ornalasqan. Onyń aýmaǵynda tolyqqandy qalalyq ınfraqurylym bar: jol belgileri, baǵdarshamdar, asqana, dúkender men kafeler jumys isteıdi. AES mańynda 146 myńǵa jýyq halqy bar ondaǵan eldi meken ornalasqan.
AES salynǵanǵa deıin aımaqtaǵy turǵyndardyń negizgi tabys kózi balyq aýlaý bolatyn. Alaıda stansıanyń iske qosylýymen kóptegen adamdar turaqty jumysqa ıe boldy. Ásirese, jas mamandar arasynda jumysqa ornalasý múmkindigi artty. Tánvan AES-i jergilikti halyqtyń turmysyn jaqsartyp qana qoımaı, ınfraqurylymnyń damýyna da serpin berdi.
Lúhy aýylynda ósken Gýı Máý AES qurylysyna kýá bolǵan 6 jasar qyz edi, al qazir ol oqýyn aıaqtap, stansıada jumys istep júr. Ol bylaı deıdi: «Búgingi tańda balyq aýlaýmen tek úlken kisiler aınalysady. Buryn balyq aýlap kún kórgen jastar qazir AES-te jumys isteıdi. Olar jaqsy jalaqy alady. Bizdiń aýyl AES-ke eń jaqyn ornalasqan. Men osy aýylda óstim, buryn munda jaryq ta, jol da joq edi. Jańbyr jaýsa, balshyqqa batyp, júre almaıtynbyz. Kólik te az bolatyn. Qazir kópir salynyp, jaǵdaıymyz jaqsardy. Eń bastysy, jumyssyzdyq azaıdy».
Tánvan AES-iniń damýy aımaqtaǵy halyqtyń ómir sapasyn jaqsartyp, ekonomıkalyq damýǵa da oń áser etti.