Memleket basshysy eki eldiń ınvestısıalyq yqpaldastyǵy da udaıy keńeıip kele jatqanyna nazar aýdardy.
– Qytaı Qazaqstan ekonomıkasyna 27 mıllıard dollar ınvestısıa saldy. Bul, shyn máninde, óte jaqsy úderis. Sondyqtan osy jumys tabysty túrde jalǵasady dep tolyq senimmen aıtýǵa bolady. Bizdiń elimizde qytaı kapıtaly bar 6 myńnan astam kásiporyn jumys istep jatyr. Olardyń arasynda CNPC, CITIC, SINOPEC, HUAWEI sıaqty álemdik deńgeıdegi myqty korporasıalar bar. Budan bólek, iri jáne orta bıznes ókilderi jumys isteıdi. Biz barlyǵyna erekshe kóńil aýdaryp jatyrmyz. Qytaı Halyq Respýblıkasynyń Tóraǵasy, qadirli dosym Sı Szınpın myrzamen birge kóp salaly qazaq-qytaı yntymaqtastyǵyn damytý úderisin únemi baqylap otyrmyz. Osy joly Qytaı tarapy men bastaǵan qazaq delegasıasyna erekshe kóńil bólip, ystyq yqylasymen qonaqjaılyq kórsetti. Resmı saparym tıimdi, oıdaǵydaı ótti dep sanaımyn. Tóraǵa Sı Szınpın myrzamen ótken kelissózder nátıjesin óte joǵary baǵalaımyn. Elderimizdiń arasyndaǵy qarym-qatynastyń bolashaǵy jarqyn bolaryna senemin. Osyǵan oraı, qurmetti Sı Szınpın Tóraǵaǵa qazaq-qytaı baılanystaryn nyǵaıtýǵa qosyp jatqan úlesi úshin shynaıy rızashylyǵymdy bildirdim, – dedi Qasym-Jomart Toqaev.
Memleket basshysynyń aıtýynsha, búgingi basqosý bıznes ókilderi arasyndaǵy baılanystardy odan ári nyǵaıtýǵa zor septigin tıgizeri anyq.
– Qazirgi tańda Qazaqstan turaqty túrde damyp keledi. Bizdiń ekonomıkamyz – Ortalyq Azıadaǵy eń iri ekonomıka. Jalpy, jyl saıynǵy ósim qarqyndy dep aıtýǵa bolady. Osy jyldyń sońyna qaraı jalpy ishki ónim 300 mıllıard dollardan asady degen boljam bar. Bul – ekonomıkany ártaraptandyrý, ınvestısıalyq ahýaldy jaqsartý jáne t.b. úshin qabyldanǵan keshendi sharalardyń nátıjesi. Sondaı-aq bul – Qytaımen tabysty qarym-qatynastyń aıqyn kórinisi. Qazaqstanda ınvestorlardyń quqyqtary men múddesin qorǵaý úshin qolaıly jaǵdaı jasalyp jatyr. Osy maqsatpen Ulttyq sıfrlyq ınvestısıalyq platforma engizilip jatyr. Sonymen qatar Investısıalyq shtab jumys isteýde. Bul qurylym shuǵyl sheshimder qabyldap, ınvestorlarǵa jan-jaqty memlekettik qoldaý kórsetedi. Bıylǵy maýsym aıynda Tóraǵa Sı Szınpın myrzanyń Qazaqstanǵa sapary barysynda Investısıalardy kótermeleý jáne ózara qorǵaý týraly kelisimge qol qoıyldy. Eki el arasyndaǵy vızasyz rejım de iskerlik baılanystardy keńeıtýge tıimdi yqpal etýde. Shyn máninde, bizdiń strategıalyq seriktestigimizdiń áleýeti zor. Qolda bar múmkindikterdi tolyqqandy paıdalaný qajet, – dedi Prezıdent.