Qazaqstan Respýblıkasynyń Memlekettik hatshysy Qyrymbek Kósherbaev Kavkaz musylmandary Basqarmasynyń Tóraǵasy Sheıh-Ýl-Islam Allahshúkir Pasha-Zademen kezdesti, dep habarlaıdy almaty-akshamy.kz Aqordaǵa silteme jasap.
Taraptar kezdesý barysynda HHİ ǵasyrda álemdik qaýymdastyq kóptegen syn-qaterlermen betpe-bet kelgenin, onyń ishinde áleýmettik jáne dinaralyq qaqtyǵystarǵa sebep bolatyn dinı ekstremızmniń beleń alǵanyn atap ótti. Bul rette qordalanǵan máselelerdi sheshýdiń tıimdi strategıasyn ázirleý, sondaı-aq, dinder men konfesıalardyń, ulttar men ulystardyń úndestikte ómir súrýin qamtamasyz etý - mańyzdy jumystardyń biri.
Qyrymbek Kósherbaev aımaqtyq jáne jahandyq deńgeıdegi konfesıaaralyq dıalogty nyǵaıtý bizdiń el ustanǵan saıasattyń basym baǵyttarynyń biri ekenin aıtty. Qazaqstan osydan 20 jylǵa jýyq ýaqyt buryn Álemdik jáne dástúrli dinder kóshbasshylarynyń sezin ótkizý týraly strategıalyq usynysyn jarıalaǵan bolatyn. Bul bizdiń elimizdiń rýhanı kóshbasshylarmen syndarly dıalog ornatýǵa, zamanaýı syn-qaterlerge qarsy birlesken tıimdi jaýap tabýǵa umtylysyn dáleldeıdi.
Qyrymbek Kósherbaev Sheıh-Ýl-Islam Allahshúkir Pasha-Zadege Álemdik jáne dástúrli dinder kóshbasshylary seziniń jumysyna únemi ári belsendi qatysyp kele jatqanyna, Kavkaz musylmandary basqarmasynyń konfesıaaralyq jáne dinaralyq dıalogty ilgeriletýge qatysty Qazaqstannyń usynystaryn qoldap otyratynyna rızashylyǵyn bildirdi.