Munda tórt valentti Gardasıl vaksınasy qoldanylady.
Qyrkúıekte 11 jastaǵy qyzdarǵa adam papılloma vırýsyna qarsy vaksına salynady, dep habarlaıdy Almaty-akshamy.kz
Bul týraly DSM Sanıtarıalyq-epıdemıologıalyq baqylaý komıteti tóraǵasynyń orynbasary Zaýre Ahmetova málimdedi.
"Bıylǵy qyrkúıekte 11 jastaǵy qyzdarǵa adam papılloma vırýsyna qarsy vaksına salý josparlanǵan. Adam papılloma vırýsyna qarsy vaksınasıa úshin adam papılloma vırýsynyń eń onkogendi túrlerinen qorǵaıtyn AQSH-tyń 4 valentti "Gardasıl" vaksınasy qoldanylady. Adam papılloma vırýsyna qarsy vaksınasıa onkologıalyq aýrýlardyń, sonyń ishinde jatyr moıny obyrynyń aýyrtpalyǵyn azaıtady jáne jalpy halyqtyń densaýlyq kórsetkishterin jaqsartýǵa, onkologıalyq aýrýlardan bolatyn syrqattanýshylyq pen ólim-jitimdi tómendetýge yqpal etedi", - dedi Zaýre Ahmetova.
Spıker elimizde jyl saıyn jatyr moıny obyrynyń 1900-ge jýyq jańa jaǵdaıy tirkeletinin jetkizdi. Ókinishke qaraı, jyl saıyn 600-den astam áıel osy aýrý túrine qaıtys bolady, dep jalǵastyrdy ol.
"Búginde adam papılloma vırýsyn juqtyrmaýdyń jáne jatyr moıny obyrynyń aldyn alýdyń jalǵyz ádisi – vaksınasıa. 135 el adam papılloma vırýsyna qarsy vaksınasıanyń tıimdiligin eskere otyryp, bul vaksınany ulttyq ımmýndaý baǵdarlamalaryna engizdi. Onyń ishinde Ózbekstan, Qyrǵyzstan, Tájikstan, Túrikmenstan memleketteri bar", - dedi DSM Sanıtarıalyq-epıdemıologıalyq baqylaý komıteti tóraǵasynyń orynbasary.