Tájikstan jaǵy ázirge oqıǵaǵa túsinikteme bermedi
Qyrǵyzstannyń Batken oblysynda tájik áskeri qyrǵyz shekarashysyna shabýyl jasady: olar onyń kóligine tas laqtyryp, ustaýǵa tyrysty. Bul jóninde Qyrǵyzstan ulttyq qaýipsizdik jónindegi memlekettik komıtetiniń shekara qyzmeti habarlady, dep jazdy Baq.kz.
Vedomstvo málimetine qaraǵanda, qyrǵyz shekarashysy Leılek aýdanynyń Arka-Borbordýk tranzıt trassasynda jeke kóligimen kele jatqan. Janar-jaǵarmaı stansıasyna jaqyn mańnan burylǵan kezde tájik sarbazdary kúsh kórsetken.
«Tájikstannyń bes áskerı qyzmetkeri qyrǵyz azamatynyń kóligine tas laqtyrdy. Odan bólek, Qyrǵyzstan áskerı qyzmetkerin ustaýǵa árekettendi, biraq onysynan túk shyqpady» - delingen vedomstvo habarlamasynda.
Tájikstan jaǵy ázirge oqıǵaǵa túsinikteme bermedi. Qyrǵyzstan jáne Tájikstan shekara qyzmetiniń ókilderi atalǵan oqıǵany talqylaıdy dep habarlandy.
Jalpy uzyndyǵy 970-980 shaqyrym qyrǵyz-tájik shekarasynyń búginde tek 519 shaqyrymy ǵana demarkasıalanǵan. Eki el arasynda jerge, sýǵa talas jıi baıqalady. Keı ýaqytta qarý qoldanylyp, adam ólimine deıin ulasady.
Bıyl sáýir aıynyń sońynda Qyrǵyzstan men Tájikstan shekarasynda bolǵan qantógisten keıin eki memlekettiń topografıa toptary birneshe ret kezdesip, hattamaǵa qol qoıǵan. Ázirge Bishkek pen Dýshanbe qujattardy jarıalaǵan joq. Alaıda shilde aıynda keıingi úsh kezdesý nátıjesinde eki tarap shekaranyń 40 shaqyrymy boıynsha kelisimge kelgeni habarlanǵan.